中共上個禮拜喺北京開完四中全會，強調「黨領導一切」，又話要「建立健全特區維護國家安全的法律制度和執行機制，支持特區強化執法力量」，大有為《基本法》23條立法向港府施壓嘅意思。八方噚日睇新華社，話為咗「推動興起學習宣傳貫徹黨的十九屆四中全會精神熱潮」，中宣部已組成中央宣講團，準備後日起就走勻全國各地宣講。
前年開完十九大，中共都成立十九大宣講團，仲破天荒派員落黎香港，分別同特區高官、社會各界人士同埋中央駐港機構企業代表搞咗三場報告會。嗰陣仲係中央文獻研究室主任嘅中央委員冷溶，同中聯辦主任王志民，「應邀」為240位特區高官宣講十九大精神。特首林鄭月娥、行政會議成員、政治委任官員同埋D3以上高官，個個乖乖坐喺度接受兩個鐘單向式灌輸，學習「習近平新時代中國特色社會主義思想」。𠵱家中央又成立四中全會宣講團，唔知遲吓又會唔會落嚟香港，指導特區高官要點樣「止暴制亂」呢？