今個星期一，一班記者喺頭盔貼上「查警暴止警謊」標語，喺警方記者會入面抗議，事後無綫新聞報道呢單新聞，播出樹仁大學新聞與傳播學系主任梁天偉訪問，梁天偉喺訪問中鬧抗議嘅記者搗亂，又話咁做唔應該，佢呢番言論立即俾樹仁學生同市民圍插，點知成件事出現峯迴路轉局面，梁天偉前晚向無綫新聞開火，話對方喺佢不知情下偷偷錄音，又鬧訪問斷章取義，仲話TVB助理總經理袁志偉已向佢一再致歉，仲話會追究有關記者。
指袁志偉已道歉
梁天偉前晚透過《新傳網》澄清，話原本佢拒絕錄影採訪，所以改做錄音訪問，而記者當時冇話已開始錄音，所以講嘅內容全屬傾閒偈，又話期間有一條問題，問佢「一般情況記者咁做算唔算搗亂？」佢當時順住答都「算搗亂」，但到播出時候就斷章取義，而且傾完呢一輪，佢一直等記者回電再正式錄音訪問，但個記者一直冇打畀佢，佢批評咁做完全不符新聞採訪程序及違新聞道德，又話事後向袁志偉投訴個記者，花哥向佢一再致歉，又話追究有關記者。八方睇返當日條新聞旁白，個記者係李卓謙。
不過又話分兩頭，當梁天偉解釋係真，但CCTVB播嘅內容，又真係出自梁天偉把口，只係佢冇諗住公開講，究竟公開講嘅嘢，同佢私下傾閒偈嘅嘢，邊樣更接近佢真心想法？而且如果花哥致歉，咁大個機構理應公開道歉，但八方又唔見，八方曾搵花哥了解，但佢冇聽電話。
李八方
