何君堯遇襲一事被北京及建制拿來大造文章，企圖迫令政府取消區選。有民主派中人直言，以他了解政府雖仍想如期舉行區選，但絕不能低估某些建制派與京官結合取消區選的力量，「政府開頭夠唔想用緊急法立蒙面法，最後咪又畀佢哋成功逼到」，而對他們而言，順利舉行區選不止是損失議席如此簡單，「喺部份建制眼中，如果區選等同全民表態，建制喺議席同得票都大敗，等如一次對建制、甚至以往港澳工作的不信任投票，國際社會亦會視之為港人變相公投」。
「如果大敗好多人要孭鑊」
該名民主派人士直言，建制終極目標不是押後，而是取消區選，「你睇葉國謙講埋要一、兩年後再搞，連冇咗區議會點填嗰117席區議員選委都諗定，就知呢班人唔止押後咁簡單」，事實上建制雖放風對區選仍有信心，未必會出現大敗局面，但也有建制中人私下對他說，「萬一建制喺區選嘅議席同得票都大敗，咁後果好嚴重，因為區選係真正一人一票選一個議席，等同變相公投反送中運動，如果民主派大勝，即係話北京、建制話乜嘢民意支持止暴制亂、支持差人全部係大話，呢隻鑊好多人要負責」。
他又說對國際社會而言，區選也是一次港人在反送中的變相公投，「如果民主派區選大勝，外國會解讀成反送中得到主派民意支持，而呢個民意係有官方、正式認可下得到，北京亦冇得反駁」，國際社會有更大理據代港人向北京施壓，「所以區選不論對本地或國際反送中戰線都重要，真係一票不能少、所有支持反送中、反警暴都要投票」。
季陶
周一、三、五刊出