梁靖琪（Toby）早前低調再婚兼極速有喜，噚日佢同韓君婷、郭少芸同何紫綸喺尖沙嘴出席醫學美容藥廠記者會。
肥咗二十磅
Toby雖然懷胎七個幾月，依然着住四吋高踭鞋現身，佢話：「老公其實唔畀，之前試過好多對鞋、好多條裙都唔啱，然後就喊。其實有BB以來喊過兩次，第一次係執嘢執唔掂就喊，其實懷胎以來自己情緒算好好。」不過佢承認記性好差，又易攰想瞓。
Toby透露預產期係明年1月：「如無意外係豬仔，自己開始好緊張，成日發夢生仔。」仲大讚老公好照顧佢，有預早準備BB用品，每次都陪佢做產檢。不過佢就話已經接咗套電視劇喺6月開拍，未知會唔會唔捨得BB，最擔心係趕唔切收身，仲自爆肥咗二十幾磅，好彩朋友都讚佢陀得靚。同場嘅韓君婷話𠵱家打工吸收經驗，啱啱過44歲生日嘅佢仲話：「33歲生日紋身留念，44歲就紋眉。」
撰文：馮仁昭
