早排新股滔搏（6110）同埋魯大師（3601）炒起，近排中手游（302）炒得更癲，共通點係招股價賣十幾倍PE，但近兩年盈利複合增長率有幾成，牌面變咗大平賣，上市夠水位大炒。
中手游有閱文（772）、Bilibili、快手、微博入股，公開超購逾500倍，首日曾跌穿招股價2.83元，第二、三日先炒上。如果中手游好到爭住買，點解第一日有低位畀人買？
中手游業務係買版權返嚟，跟住自己或外判畀人開發遊戲。隻game外判畀人開發嘅話，咁隻game總流水當中，14%至25%畀外判遊戲開發商，5%至9%畀IP版權方，30至50%畀發行渠道，中手游中間做下宣傳、測試、提供發行平台，就可以收總流水嘅18%至51%。論議價能力應以IP版權方最高，呢個收成比例令人摸不着頭腦。IP協議一般為期3至5年，如果到期，正路IP版權方會開天索價吧。如果中手游有後台撐腰賺到盡當然講得通，係嘅話又會19倍PE上市益街坊？用4年前美國私有化成本高一成嘅接近平手價招股？更重要係，間公司起源來自舊年長期停牌嘅第一視頻（082），完。市況好嘅話，中手游有概念雞犬皆升唔奇，但呢一刻人多擠逼，加上盤生意有疑團，長遠就唔太信了。
晉佳
http://fb.com/advanceguy1
本欄逢周一、三、五刊出