校友會主席安東尼偷得浮生半日閒，閃咗去東京度周末散心，星期六晨早就傳咗一張相過嚟，話在豐州魚市場食壽司早餐，排緊隊，佢話：「豐州冇乜氣氛，好似入咗大丸地庫超市，整齊到極，乾淨異常，反而令人懷念築地嘅氣味與風格，夠新夠現代化其實未必係好」。遊客大多鍾意懷舊，領略幾十年前獨特風味，如果所有地方舊市場都全部翻新似現代mall，遊PP、IFC、Siam Paragon、新宿高島屋就夠啦，駛乜周圍行！曼谷耀華力路與石龍軍路近湄南河一帶，華裔（其實泰國華人與泰人通婚多年，已好難分，唐人街只不過係舊稱謂，多啲老人識講潮州話而已）聚居百年，稱為曼谷China Town，幾年前左丁山去到第N次，發覺與1972年初到貴境，搵「海天樓」飲茶嘅環境，並無多大改變，果真係50年不變，唯一變異，就係更污染，空氣更難頂，塞車更厲害，所以在耀華力路行咗20分鐘，在林真寶買包牛肉乾，就走夾唔唞。最近睇報紙話將有地鐵開到唐人街，地產商聞風而至，收買舊樓拆建起現代mall，將唐人街現代化咁講，點知有大把人反對，話新大樓商場會破壞唐人街傳統舊觀喎。
現代化還是保育舊建築，係大城市一個發展難題，正如肥仔K近月在日本發現不少人問佢有冇入過九龍城寨（當然冇），日本竟然有一啲粉絲為九龍城寨着咗迷！但舊九龍城寨點適合21世紀人類居住呀，拆咗重建實有其必要，香港土地資源珍貴，又唔可以奢侈到遷徙原城寨居民而保留城寨作為「歷史文物」嘅啫！
安東尼吃過壽司魚生，慕名去高田馬場（近早稻田大學）遊玩，早稻田並無特定校園如中大，學校建築物散佈在幾條街上，星期六中午人頭湧湧，原來係要到創辦人（第一任校長大隈重信）銅像前影相。大隈重信在明治維新年代與伊藤博文等人係重要人物，經常在築地私邸開會議論國事，1882年10月開設東京專門學校（今日早稻田大學），中國共產黨創始人陳獨秀李大釗都來早稻田留學。安東尼排隊入早大歷史館參觀，見到有孫文函件，係1914年5月1日，上款係大隈伯爵首相閣下，內容係邀請日本協助支那民黨（中國國民黨）反袁世凱，事成則支那開放全國市場惠日本工商，而日本獨佔貿易上之利益。
孫文信內提及支那多次，不稱中國（想當時或仍無此概念，只有大清或中華民國）。以今日政治觀點看，孫文顯然是勾結外國勢力，干預中國內政，稱中國為支那，乃大逆不道漢奸乎！