「我知道自己係老人家，完全冇否認，不過喺心態上冇接受到，你提我咪知。」現年74歲、於60年代創立搖滾樂隊Teddy Robin and the Playboys的泰迪羅賓（Teddy Robin），日前在大角嘴接受《蘋果》專訪，指自己沒有受年齡所限制，仍然想同年輕人互相學習，繼續堅持「最緊要好玩」。
撰文：唐琛悠
攝影：沈健程
泰迪羅賓的訪問在一間舊工廈band房進行，沒有堂皇的門面，亦沒有豪華的裝修格局，甚至間中傳來大廈水箱的滴水聲，內裏只擺放數支Teddy珍藏多年的結他及一套鼓，不過最重要的是，這間band房是他與兒子共同創立。而band房除維繫父子情外，亦聯繫了他與其他band友的關係，Teddy不時到此夾band敍舊。
「唔好當我係前輩」
Teddy近年參與不少電影的工作，但他未有忘記「Rock'n Roll Never Die」的精神，早前他就為香港開電視主持《點指Band Bang》，實行以歌會友兼提攜新人，希望為地下樂隊帶來知音，而他本身亦有與一班後生仔組織樂隊「柳暗花明又一村」，他笑說：「我哋每個月彈兩、三次，喺細細地方玩吓，當興趣，同啲後生仔一齊寫歌，始終搣唔甩自己嗰啲嘢，想有啲新嘢加入。」74歲的他仍然與後生傾得埋：「我仲好想學嘢，想同年輕人互相學習，佢哋鍾意同我玩咪得，唔好當我係前輩，我本身冇大冇細，而且又唔係好鍾意刻意嘅交往，隨心就得。」
訪問期間Teddy手執一支紅色結他，他說：「講緊有20年以上，嗰陣係球隊去美國踢波嘅時候，搵Joey Tang幫我揀，佢話呢個細細支啱我，我哋都一齊試，我一直keep住，𠵱家結他有少少毛病，但係唔捨得唔要，我本身唔係好多收藏，十零支左右，有啲仲借咗畀朋友，𠵱家戒咗買。」
流浪如拍武俠片
結他有自己的故事，Teddy亦有很多經歷，當年其樂隊走到高峯時，他就突然出走去流浪：「嗰個係我低潮期，我冇諗咁多，覺得作為一隊band已經去到頂，睇唔到前面條路可以點行，大家都知唔會有上一層嘅機會，冇散band，但係都各自搵緊自己嘅機會。我搵條路比較怪雞啲，決定走出去見識吓世界，就算喺隧道唱歌都好，我都要經歷吓，玩band都可以去唔同地方流浪，嗰陣拎住結他闖蕩，好有拍武俠片嘅感覺，𠵱家諗番都好過癮。」
見識過後，Teddy想將經歷拍出來：「經歷咗多嘢，我好想將呢個感覺拍出嚟，係拍一隊亞洲band，點樣喺白人嘅世界闖蕩，都幾過癮，但係因為唔商業，所以搵唔到老闆，不過我冇放棄，叫美加朋友幫手搵吓。」現今計劃多多的他，表示開始過慢活生活：「每年搞一、兩件大事，𠵱家搞緊劇本，希望今年年尾可以開得到，題材唔知新唔新，但係一啲我自己覺得過癮嘅題材，係一啲唔係太傳統嘅嘢，自己覺得幾好睇。我成日覺得電影同音樂，兩個字就搞掂晒，好睇、好聽，當然講就好容易，但係好難達得到。」
化妝：YenYeung of LY