林德信跟拍拖兩年多的女友Candace日前下午4時許，現身灣仔一間歐洲汽車陳列室睇車，林德信和經紀交談時，女友就不停撳電話，之後兩人逐架車試坐，林德信又上車試軚盤手感，又女友就繼續撳電話。睇完一輪後，由經紀向兩人講解，其間林德信似乎對車的顏色有興趣，不時和女友密斟，又望着兩款車做對比，然後再開車尾箱研究，再同經紀傾了幾句才離開陳列室。
之後兩人行去後街，原來林德信架綿羊仔泊在街邊，他上車後就載着女友過海到九龍灣。泊車後兩人再入一間日本汽車陳列室，同樣好認真逐樣試。之後更在九龍灣的幾間陳列室遊走，不過他和女友一直沒有拖手，亦沒有親暱舉動。另外，林德信昨日到商台為電影《獅子山上》宣傳，他表示會包兩場邀請家人及朋友欣賞，問到女友是否會看「家人場」？他就尷尬儍笑。再問到是否已帶對方見家長？林德信尷尬說：「應該有見嘅。」
採訪、攝影：朱志聰、梁繼光、盧妹