阿仙奴領隊艾馬利證實，格列沙加已被褫奪隊長臂章，槍手隊長會由奧巴美揚接任。艾馬利星期二同沙加講，佢已唔再係隊長人選之一。艾馬利話︰「我認為我哋要更多時間處理，首先要保護佢同畀佢冷靜，每日同我哋一齊操練。今日我同佢傾過，話佢已唔再係隊長人選之一，佢都接受。」艾馬利又話︰「家陣我哋有奧巴美揚、比利連、拿卡錫迪同奧斯爾四名隊長，首選會係奧巴美揚。」