執葉律師何君堯噚日喺屯門擺街站為區議會選舉拉票期間遇襲，俾人用刀刺傷心口，雖然只係皮外傷，但八方始終反對選舉暴力，唔like執葉律師，11.24記得去投票就得，不過疑犯同把刀咁拮埋去，何君堯只有一個1.5cm傷口，又咁身手敏捷即時縮開，好似一早知疑犯會拮佢咁，再加埋何今次選情麻麻，好多網民懷疑有人想做陳水扁2.0，藉呢單嘢打悲情牌，有內地新聞工喺微博發文，懷疑成件事好似早有準備。而集合網民力量，最少搵到五大疑點，佢哋認為警方必須追查到底，找出真相，咁網民又發現有乜疑點？
疑點1：拍片一氣呵成
要襲擊人，梗唔會事先張揚，受襲者更加唔會預知，網民奇怪點解今次何遇襲，可以有人在場將事發過程全程拍片，由「獻花」到行動、眾人制服施襲者一氣呵成全紀錄，而且拍片嘅人見到有人拎刀，完全冇諗住驚到走，好鎮定咁一路拍，有網民話一早就有人揸定機拍片，但通常呢啲情況係有事發生咗先會攞機拍，再加埋仲有兩個助手一早企埋去，好似準備好晒。
疑點2：鬧市出手離奇
事發地點熙來攘往，有網民認為正常情況下，兇手唔會選擇喺人來人往嘅地方出手，因為好難逃走，而且何君堯喺多個助選團陪同下擺街站，對兇徒嚟講絕對唔係合適嘅出手時間同地點，當然預咗被拉又係另一回事！
疑點3：施襲者冇頑抗
事發後施襲者睇嚟幾易被制服，甚至受傷嘅何君堯仲可以加入戰團將對方按喺地上，過程冇激烈掙扎，連旁觀街坊都冇走避。
疑點4：旁人出手奇快
何被襲後，助選團等多人瞬間合力制服施襲者，表現好合拍，有傳入面有何請嘅保鑣，但保鑣冇先保護老細走，反而去捉犯，又真係奇！而有網民話：「米色衫個阿叔按佢（疑犯）落地下好似撳掣咁，有冇快成咁呀？如果係真，黑警真係冇用啦。」
疑點5：閃避反應異常
電光火石之間有人一刀插佢，但何好似葉問上身咁避開，僅皮外傷，八方唔知佢係咪一早對「獻花者」有防範，但網民普遍讚揚他「反應實在太快，超乎常人。」「佢（何）身手幾好，反應好快。好多年輕人都唔係佢嗰皮！」甚至係施襲者打開袋之際似乎已作好準備，「反應好似快得滯。」
李八方