賭王何鴻燊家族喜事連連，繼四房大女何超盈9月底誕下B女「荷包蛋」辛千覓，孻仔何猷君喺上月底宣佈同內地超模奚夢瑤生咗兒子何廣燊，仲要係賭王第一個男孫，原來三房也有喜事，賭王兩個月連抱三孫。
三房孻仔何猷啟嘅內地老婆GiGi預產期原本係今個月初，但原來佢早產，喺上月中同猷啟再做父母，女兒喺香港出世，據知猷啟安排太太喺九龍一間醫院生B女，母女平安。猷啟去年秘密做爸爸，大女Tittania已一歲多，今次再度生女，即兩年抱兩。再做人父嘅猷啟，噚日回覆時話：「多謝大家關心，母女平安，好開心再做爸爸，𠵱家太太坐緊月休息緊，BB女同家姐英文名一樣，都係T字頭，叫Tylia。」猷啟嘅胞姊超蓮就表示：「再做姑媽好開心，又多一個姪女，BB個樣好得意，肥肥白白。」
三太低調零回應
何家家族喜事連連，三太陳婉珍再度抱孫女，但仍然維持低調作風，噚日下午近2時，三太乘座駕到達跑馬地養和醫院，一身簡約裝束現身，在場傳媒恭喜佢同問到孫女幾時出世，三太都顯得避忌，未有任何回應，又冇展露笑容，急步匆匆走入醫院大堂。
撰文：馮仁昭
