八方噚日寫華記茶餐廳老闆楊官華疑似喺新加坡搞藍絲集會瀨嘢，結果俾新加坡差人拉咗，隨時要坐幾年監。前晚華記出po證實傳聞，連護照都俾新加坡警方扣埋，佢仲話預咗坐幾年監，不過佢喺片入面對搞政治聚會一事推得一乾二淨，交畀新加坡執法部門。
楊官華喺片入面話，原本去新加坡係尋找「生意商機」，又話自己從來唔講政治，只係出於禮貌出席餐廳聚會並同人合照，結果俾一班居星港人陷害，拎啲相報警拉佢，又點名指高登、連登討論區都有網民誣告佢。佢承認最初低估呢件事，又話已作最壞打算，預咗坐監。
連登仔反擊，話佢曾經喺fb發文，稱會喺新加坡搞華記閒聊聚會，並唔係楊所講「有人請佢去」，有網民仲上載當日活動片，佢有討論香港局勢，又有講中共、港府同港人關係，並唔係佢所講冇談政治，連登仔決定要「還原真相」，將啲料電郵畀新加坡執法部門，話要令楊官華可以面對公平審訊喎！
