八方噚日出咗警隊二哥、警務處副處長鄧炳強張全副武裝親自落場「驅散」示威者嘅相，原來唔只藍絲要幫佢搞造神運動，連北京都出手！官方人民網fb專頁噚日都登咗鄧炳強呢張威威相，不過張相搞錯少少嘢，令鄧炳強由警隊未來一哥，變成差人口中嘅「暴徒」！
網民︰講出搞亂香港真兇
話說人民網喺二哥嗰張威武相配上八隻大字︰全力以赴 止暴製亂！止暴製亂？大家冇睇錯，係「製亂」而唔係「制亂」，即係話二哥製造暴亂，咁咪即係變咗差人口中嘅「暴徒」？呢張相立即俾人瘋傳，有網民話明顯整呢張圖嘅係強國人，殘體字轉正體字，就「製」、「制」不分，搞出大笑話！
不過網民留言仲搞嘢，有人話乜今次官媒竟然講真話，講出搞亂香港真兇！又有人話支持警察嘅人一向唔識字，有乜咁出奇，亦有人講人民網講出差人全力以赴製亂，講出港人心聲！有咁多香港人大讚官媒有良心，怕且少有！不過大家唔使諗住去睇，又或留言撐下人民網，因為個po好快俾人刪咗，完全係毀屍滅迹嗰種，咁都係嘅，如果唔刪文，鄧炳強由警隊未來一哥變成「暴徒」，真係情何以堪呢？
李八方