利物浦嚟緊12月中會去卡塔爾踢世界冠軍球會盃，但英媒爆料，紅軍拒絕入住大會安排嘅五星級酒店，竟然係同人權問題有關！
賽會原本安排紅軍入住一間喺多哈人工島嘅五星級豪華酒店，但紅軍拒絕，因為呢間酒店剝削員工，以低於當地最低工資嘅人工請佢哋。報道話，呢間黑心酒店嘅保安，每日都要喺攝氏45度高溫下做嘢，但日薪竟然唔夠8鎊（約80港元）。利物浦雖冇證實事件，不過佢哋上年曾出過聲明，強調球會遵從英國議會嘅《現代反奴隸法案》，喺進行商業活動期間會維護人權同尊嚴，所以紅軍今次拒絕入住鬧出人權醜聞嘅酒店一啲都唔奇。
高普撐文尼唔會插水
利物浦不嬲形象好正面，但爭標勁敵曼城嘅領隊哥迪奧拿，就喺兩隊今個星期嘅英超榜首大戰前「抹黑」佢哋，批評紅軍射手沙迪奧文尼鍾意插水。紅軍領隊高普星期一就為愛將平反，質疑哥帥道聽途說：「我想知道佢點解咁快就知道我哋場波嘅嘢。」佢之後又為文尼澄清：「我可以話你知文尼唔係插水王，對維拉場波，佢係喺同對方接觸後先跌低，唔係無端端跳起再趴落地。」高普其實一向都好支持旗下球員，文尼受訪時都話，紅軍成班球員都好鍾意「高爹哋」。
奧利華主吹利紅剋藍
講番場榜首大戰，英超賽會宣佈會由奧利華執法，呢位球證季初吹過曼城主場對熱刺場波，結果佢裁定加比爾捷西斯補時食詐糊，令曼城只能賽和熱刺2:2，痛失兩分。相反，奧利華今季吹過兩場利物浦嘅聯賽紅軍都贏，包括開鑼戰大勝諾域治4:1，同埋9月作客贏車路士2:1。至於紅藍戰坐喺VAR控制室嘅球證，會係今季吹過曼聯1:2輸畀水晶宮嘅泰亞尼，不過佢喺嗰場比賽就俾紅魔領隊蘇斯克查批評，話佢漏判12碼。唔知呢場大戰，奧利華幫唔幫到紅軍保住不敗身？