因心臟病唞咗半年嘅西班牙門將卡斯拿斯，星期一重返波圖操練，準備復出。卡斯拿斯星期一喺twitter上載咗張波鞋相，佢留言話：「你已經停低咗6個月零3日。」西班牙《阿斯報》指「聖卡斯」星期一獨操咗廿幾分鐘，情況良好，或可喺將來重投一隊集訓。
另外，43歲嘅皇家馬德里名宿古迪，星期一落實成為西乙球會艾美利亞嘅新帥，正式展開執教生涯。古迪退役後先喺皇馬執教青年軍，上季登陸土超出任比錫達斯助教，今次重返西班牙球壇，終於首度成為球會主教練。艾美利亞下星期日會喺主場迎戰有日本國腳香川真司壓陣嘅薩拉戈薩，會係古迪領軍嘅「地標」戰。