育有三女一仔嘅林盛斌（Bob）工作、家庭兩邊忙，不過佢唔會顧此失彼，一有時間就會陪住屋企人，非常顧家，佢喺社交網好多時都會分享家庭樂片段，睇得出阿Bob的確係廿四孝爸爸，日前佢就被發現喺一間快餐店出現，一家六口一齊食早餐，見佢好忙碌照顧「皇帝仔」與「皇帝女」，唔會偏心。
𠱁三女食早餐
當日阿Bob似乎唔使開工，着住T恤短褲踢拖一身街坊裝，顯得好悠閒，但為人父母亦都要勞心勞力，佢喺快餐店內半彎住腰，好細心咁𠱁三女機機食早餐，跟住又教小朋友要識得分享。不過，仔女年紀尚細成日爭住食，尤其細仔仲以為冇得食，變咗大喊包。佢哋一家人醫肚後步出快餐店，Bob嫂抱住細仔呵番，剛巧有途人帶住一隻狗企喺門外，阿Bob一家又撩隻狗玩咗一陣先離去。事後阿Bob回覆話：「今日三家姐有啲扭計，細佬就好驚冇得食。」
阿Bob細仔應該好鍾意食嘢，之前喺阿Bob社交平台分享咗一段片，係四子女排隊輪流等爸爸餵食即食麵，但排最後嘅細仔擔心冇得食緊張到爆喊，十分可愛。
撰文：馮仁昭