藍絲KOL中，喺日本搞茶餐廳嘅華記楊官華算係惹火人物，佢之前已經成日俾黃絲鬧佢言論老屈，但華記一於少理，仲俾班藍絲係咁吹捧，搞到佢當正自己係正義化身，不過日前網上傳出楊官華好似瀨嘢，隨時要坐監，而且佢出事嘅地方，仲係藍絲日夜吹捧嘅新加坡。
藍絲引述「要一別數載」
話說早前楊官華喺fb專頁「華記正能量」宣傳去咗新加坡，仲話喺當地一間食肆舉行聚會，歡迎新加坡朋友到場發表對「香港的暴動事件睇法」，但有網民發現，原來喺新加坡公開討論他國政治屬犯法，搞政治集會亦要申請，於是一齊用電郵去信新加坡政府告發楊官華。
之後有人發現，由10月20日後楊官華fb冇更新，到近日又再發文同相，但似乎係舊相，到噚日有同楊官華友好藍絲發片，稱收到楊短訊，話自己喺新加坡有牢獄之苦，形容係「中伏」、「泥菩薩過江」、「可能要同大家一別數載」，即時引起網民瘋傳，猜測佢係咪俾新加坡拉咗，之後又有其他愛國KOL發文，聲稱確認楊官華身處新加坡，但係要處理一啲問題，又話案件徹查當中，由於到𠵱家未見楊官華現身，好多網民相信佢真係於新加坡瀨嘢，有人仲話要召喚小鳳姐！
李八方