【人生頓悟】
【本報訊】三個月間，由出席撐警集會到力數水炮車如何傷害平民，自覺無辜被「染藍」的印度協會前主席毛漢褚簡寧（Mohan Chugani）親歷一場噩夢後頓悟過來，「唔知係咪個天特登安排我喺嗰度」。他笑言自己是「100%香港人」，視香港為家，電視上年輕人被捕被打畫面令人心痛，7.21、8.31及警員沒有編號等事件亦令他不解。民間五大訴求依然強烈清晰，他認為政治問題其實警方無從解決，惟有將自己奉行的營商金句贈予特首，「The first offer is the best offer（答應第一個叫價總是最佳選擇）」。
記者：黃翠儀
印度裔商人毛漢是著名傳媒人褚簡寧（Michael Chugani）兄長，於香港土生土長能說一口流利廣東話，家住尖沙嘴鄰近警署位置，「之前啲（催淚）煙都有飄入嚟，閂咗窗都聞到」。上月20日，一段警察以水炮車攻擊清真寺片段，令當時身處寺外的毛漢一夜於香港以至國際「成名」。他被藍色催淚水射中，全身「染藍」不適須入院治理，至今晚晚難以安睡，皮膚經常痕癢難當，每日仍要搽藥膏滴眼藥水，「我收到好多電話（慰問） ，印度都有啊，杜拜有新加坡又有，個仔問我點解你上咗YouTube嘅？諗諗吓，初時起嗰件事（逃犯條例）係好簡單嘅，點解搞到咁大呢？」
冀以人脈令政府正視
他回憶那場噩夢突如其來，當時數人站在寺前最多三、四分鐘，水炮車快速駛到，開咪含糊宣佈不足一分鐘便射來強勁水炮，全無時間予人考慮如何撤離，「咁你都要畀個機會人行吖，行都唔畀？已經砰！射兩次停喺處射。我仲以為佢同我影相，（車頂鏡頭）focus，第一下已經即刻嚟啦，
𠵱家香港又唔係打緊仗，我73歲有糖尿病有高血壓，成身會辣嘅好似着咗火咁」。痛得無法張開雙眼，幸好旁人帶他去用水沖身，入院後護士仍叫他換衫再沖身，兒子為他帶來替換衣物，惟獨沒有換鞋被化學物「醃咗三粒鐘」，至今仍不時感灼痛。
沉澱過後，毛漢認為政府處理手法很有問題，「架車係咁射，射到好多人，OK射中人拉到人，咁你點樣治療？你都要有衫畀受害者換先係咪？如果係男人我唔怕，我着條底褲企喺度，女性得唔得？唔得吖嘛，咁你（沖身後）着返嗰啲衫，咪又領返嘢？」藍色水成份至今未明，毛漢希望政府公開，「去到私家醫院醫生唔敢醫，咁你用得就要話埋畀人聽事後點醫嘛」。
高官紛紛來電道歉問候，警務處副處長鄧炳強亦曾約他見面會談，但對於警方「誤中」之說，毛漢不以為然，「唔係（射得準）買嚟做乜嘢呀？」他漸漸覺得，或許是天意安排他感受水炮染藍之痛，「譬如一個普通市民哎呀辣到我抽筋呀，特首或者未必信」，現時他可以身份和人脈，令政府正視問題。
10月27日，印度排燈節他出外拜神，路上再次目擊警察追捕「細路仔」過程，又聽到女士被捕時大喊救命，「我都係同鄧Sir講，唔需要幾十個警察，對付一個女性、一個示威者」。談起警方做事手法問題，毛漢習慣每日閱報，記得由報紙上讀到警方解釋7月21日報案中心線路繁忙，「呢個係藉口，我始終唔信話999打唔通呢就冇差人喺現場，如果差人喺現場，就冇（白衫打人）呢件事發生啦」。
8月31日，血染太子站一幕，亦令他對充滿疑問，「我仔同女都話好唔公平，好唔公平，突然間放啲差人落去扑扑扑啲人，港鐵係一個運輸機構，係應該運作，根本唔知差人有冇咁嘅權叫你閂唔好開，佢冇咁嘅power，我諗特首都冇呀」。他指，除非實施了緊急法，是戒嚴狀態那就可以，「所以我同你講差人過晒界就咁解」。看到很多新聞報道，蒙面警員身上並無編號，「記者問佢係唔係差人，佢又唔答。𠵱家令到成個香港社會，大部份人都憎差人，又何必呢？」
他在7月中出席「守護香港」集會，強調並非為撐警而是代表少數族裔發言，「我聽到個活動叫Protect Hong Kong，唔係Protect Hong Kong Police」。翻聽全篇發言，他的確有講明「I am not here to point any fingers at anyone（我不是要怪責任何人）」，主要表示希望香港重新出發，政府與青年作有意義的對話溝通。
視港為家 不會移民
清真寺一事，他讚賞特首「damage control（傷害控制）」反應迅速，但為何當初100萬、200萬人上街時，「已經係差唔多着晒火，點解唔即時處理件事呢？」他曾向特首直言，她身邊有很多人所給予的建議「唔係幾啱，你應該自己明白」。營商時奉行老前輩所教金句，亦希望特首參考，「The first offer is the best offer，唔好拖下拖下，啲要求一路一路高㗎喇，所以越快搞掂就越好」。他亦認為行政會議要適時換畫才可，換上一些為社會及青年接受人士，「擺返成班都係嗰啲上咗年紀嘅，我唔係話佢哋係壞人，但係英文講係out of touch of the reality（離地）」。
數個月來，香港急變，友人問他為何着緊，他總會回答：「因為香港is my home（是我的家），你感受唔到我感受嘅，我唔會移民。」事到如今，他認為已不可能不成立獨立調查委員會，但調查為公平計要全面調查，亦要警察與示威者皆獲特赦才公平，「始終係政治問題，除咗特首讓步，冇人解決到，但係示威者一樣讓步，要大家一齊讓步，我唔信呢個世界有事解唔到，韓戰都解決到」。