香港刻下困局嘅出路，真係用錢就解決到？早前喺多份親建制報章頭版刊出一則「千萬求一路」比賽廣告，呼籲港人拍片、為香港當前困局尋找出路嘅神秘人，噚日終於自爆身份，原來佢係今年52歲、聲稱每年全球生意額達一萬一千億港元嘅哈爾濱政協莊紫祥。
佢喺記者會話6月份開始睇到香港嘅情況後好唔開心，覺得應該做啲嘢，為香港尋找出路，但都要有啲「誠意」，所以開頭決定攞100萬做獎金，後來被人話「小家咗啲」後，決定出夠1,000萬，不過呢位莊紫祥上月底先接受過中共喉舌《人民日報》訪問，佢喺訪問中強調對暴力破壞者，要堅決說不，但講到今次比賽有冇任何限制時，佢即現形，講明會就參賽片段把關，片段只要唔係「純民生」內容，佢就會DQ！