和音歌手鍾達茵（Pam）跟友人合資在銅鑼灣開酒吧餐廳，卻撞正反送中，經常有「催淚彈放題」，市民消費意欲低，餐廳最終要執笠止蝕。即使富商李嘉誠名下基金會公佈應急錢計劃協助中小企捱過難關，可惜Pam已經等不及，估計蝕逾500萬。
Pam昨日接受電話訪問時說：「誠哥畀60萬都冇命享，餐廳位置喺正波斯富街口，去年3月開業辛苦經營，剛有起色，6月反送中後，生意就沉落去，我哋一班股東本來都打算共度時艱，大家有需要上嚟要水要食嘢，希望齊上齊落，但蝕得好甘，我哋一直聯絡唔到業主坐低傾，唔通佢覺得咁重災區係冇事發生，長痛不如短痛，決定斬咗佢。」
採訪：陳杰