年屆68歲嘅李龍基喺娛樂圈縱橫40年，由酒廊歌手變成歌星演員，亦係電視圈中御用皇帝，喺戲中可以三妻四妾。現實生活中李龍基喺70年代結婚，育有三個孩子，最終離婚收場。直至21年前先同內地少妻再婚，佢比太太年長27歲，更自此為愛遷居深圳，並將六個物業交由太太收租，被稱為愛妻號。不過佢前晚喺屏山一祠堂外參加盆菜婚宴做嘉賓時，身旁卻出現白衣長髮紅顏知己。
玉手放大髀
前晚除咗李龍基，同場仲有Joe Junior、方伊琪、王俊棠等做嘉賓，李龍基演唱一曲《稻草人》令觀眾情緒高漲。當時佢帶咗一位白衣長髮女伴現身，更安排女方坐喺身邊。佢對呢位女伴照顧有加，由於白衣女明顯比李龍基年輕一大截，有人誤以為佢係李龍基個女，其時李龍基身邊有人笑笑口話：「仲唔介紹你個女畀大家認識。」後來大家先知女伴原來係李龍基嘅紅顏知己。
白衣女十分健談，不斷主動放電撩李龍基傾偈，完全冇理會同枱旁人眼光，仲相當進擊，講到興起時仲俯身向前望實李龍基，雙手仲放喺李龍基嘅大髀，令冧得李龍基欲拒還迎。
李龍基雖然一把年紀，但依然寶刀未老，工作方面除咗拍劇外，又密食登台搵真銀，唔愁收入同工作機會。去年佢同葉振棠、陳浩德舉行演唱會，今年再次合體，本月將於伊館舉行三場演唱會，𠵱家已經準備得如火如荼。
撰文：馮仁昭
