【財經專訪】近月反修例示威中，優品360（2360）商舖長期成為被破壞目標，原因是激進示威者直指創辦人兼主席林子峰與北角打人案有關。林子峰在這個風暴期間，罕有接受《蘋果》專訪解畫，反問為何福建社團既有其他城中富豪成員，而全港有120萬福建人，為何只有自己成受襲目標？「日日都諗，點解優品360要被破壞，要受咁大壓力，我真係唔知點解。」
記者：陳雪蕾 周家誠
說到激動處，他表示願意押注公司股份，「若果你有證據話我同黑社會有關，我會捐咗優品360股份，冇做過怕乜？我捐晒成副身家都得」。拜菩薩的他，這個月以來一直「問因果」。他直言，人生最重要時刻都在香港度過，縱然近日事件發生令他對香港感到陌生，但他表示沒有移民念頭。
8月11日，北角一大批疑似福建大漢持械追打示威者，引起公憤。曾舉行撐警活動的香港福建社團聯會，被懷疑是號召同鄉打人的幕後黑手，而林子峰則是該會的永遠榮譽主席，他解釋：「作為福建人，喺香港又有生意做吓，人哋畀面就請我做名譽主席。呢個職位，會內超過200個，好似信置嗰老細（黃志祥）、香格里拉嗰老細（「糖王」郭鶴年）……平時唔需要理會務。我都只係捐過一次錢，就係6、7年前加入嗰陣捐過一次。」
哽咽問為何會受破壞
既然是虛銜，何不辭職撇清關係？林子峰表示，聯會只是讓鄉親聯誼，閒時舉辦敬老活動的平台，而且聯會已澄清沒有參與任何暴力，但他隨即「戴頭盔」：「如果聯會或同鄉真係有參與暴力，我係絕對唔會認同咁做。」
激進示威者另一指控，是林子峰本人是「黑社會」。他強烈否認，亦誓言沒有參與任何暴力事件。他不認同福建人等於黑社會的言論，「香港有超過100萬福建人，即係每7個有1個係福建人，唔能夠因為北角打鬥事件，將福建人同黑社會畫上等號㗎嘛。」
為求一個清白，他不惜「晒冷」以身家作人生最大豪賭，「我唔想因為我而影響公司前途，如果有憑有據，證明我林子峰或公司參與過任何暴力（事件），包括8.11北角打鬥事件，我願意將優品360所有股份捐晒出嚟。如果冇嘅，唔好再詆毀優品360，創辦以嚟，真係冇做過對唔住香港人嘅事情。」
翻查資料，林子峰與拍檔許毅芬為優品360大股東，持有75%股權，公司市值約19億元。記者要求再澄清是意味願意捐出股份?林表示，「如果你冇做過，100億都唔怕。」
政府於10月4日下午，宣佈訂立蒙面法。優品360決定提早拉閘，連續三日休業，有網民分析為「空城計」策略，放任讓人破壞。林子峰解釋，當日判斷社會局勢，估計旗下商舖破壞會擴大，才有這個決定。
那天優品360逾40間分店被「裝修」，貨品散落一地，「第二日係假期，有十幾個同事自願上班清潔善後，print晒40間舖嘅相出嚟，10幾個同事見到啲相都喺度喊」，林子峰說到此處，亦一度哽咽，「點解360會咁樣，會受到咁嘅破壞，係影響700幾個同事嘅家庭。」
他又說：「食得鹹魚抵得渴丫嘛，係咪先，你就算投資物業一樣會有輸，咁你有做咪認囉，咁冇做，你唔可以夾硬將360同黑社會扯上關係，然後日日去破壞嘛。」
對於同事，林子峰坦言感內疚，「我都想借呢個機會向同事講聲對唔住，佢哋喺前線，最擔驚受怕嘅人係佢。」他稱公司即使連續三日休業，亦有繼續出糧予員工，又承諾不會因為未能開舖而減薪、裁員或要員工放無薪假。
現在每逢周末「裝修」優品360行動仍然不絕。據該公司統計，截至10月28日止，旗下店舖遭到136次破壞，共涉及63間店舖，損失仍在點算中。
願與示威者理性溝通
有沒有憎恨破壞店舖的示威者？林子峰苦笑，「最心痛其實係呢班年輕人，因為呢場活動可能送上自己一生嘅前途。我都後生過，點解唔理性和平去傾，有啲咩唔啱就傾掂佢呢？」他表示尊重任何人合法地表達意見，但不認同以暴力針對私人企業。若社會容許，雙方又願意理性溝通，他會考慮與示威者直接對話。
被問到昔日好友「小巴大王」馬亞木及「磁帶大王」陳秉志割席，林子峰不欲多談，只說對於任何人的言論都表示尊重。談到黃藍政治取態，他不願置評，「政府應該多同唔同意見嘅人士溝通，達到共識為香港尋覓出路，畀香港人過返正常生活」。
