可能自覺有中共強大後台，呢幾個月警察濫權濫暴，無法無天，香港民意研究所早前公佈最新民調，警方獲得嘅信任只有2.6分（10分滿分），當中51.5%仲畀0分。特首林鄭似乎想緩和社會氣氛，開腔話若監警會發表報告後未能平息爭議，政府會再諗方法回應，暗示會獨立調查，唔少評論即指林鄭或對警隊「用完即棄」。
網民：做咗衰嘢唔使還呀？
可能擔心popo進一步發狂，散仔協會……吖，即係警察隊員佐級協會主席林志偉都要撰文降溫，提醒警員時刻警惕同保持冷靜理智思考，有網民直指：「𠵱家先知驚？賣就賣硬你㗎啦！做咗衰嘢唔使還呀！？」
林志偉喺最新一篇「主席隨筆」話，有別有用心嘅人成日挑釁警方，務求逼警員喺壓力或失去理智下犯錯，繼而炒作打擊警隊嘅執法權威同政府管治威信，提醒警員要警惕同保持冷靜理智思考，「在這關鍵時刻絕不可讓對方的奸計得逞，切忌跌入對方的圈套」，聲稱要依循法例及既定程序執行職務，同時又自誇警隊即使面對攻擊同抹黑，仍然保持理性克制，「贏得不少中外正義之師的讚賞」，甚至「令暴徒的氣燄受挫」，無視社會仇警，膽敢話「廣大理性的香港市民都群起表達對警隊的支持」。
李八方