電影常被形容是夢工場，實現大小的夢想與理想，做演員最引人入勝的地方，應該是演活另一個人生，甚至接觸現實不會發生的事，陳漢娜也因為這份工作，體驗到從未遇過的經歷，「做演員可以搵到另一個自己，呢樣嘢係最吸引，好多時候人都唔係太了解自己，但做演員當你突然睇番，或者諗番自己做過嘅嘢，就會發現原來自己係咁。由睇劇本到完成一套戲，成個人都好似成長咗，因為經歷咗另一個人生。」
撰文：陳蔚渝
攝影：周樂恒
外表沉靜、帶點「厭世臉」的陳漢娜，三年前因為一次電影試鏡機會被賞識，拍攝《殺破狼 · 貪狼》飾演古天樂的女兒，由模特兒踩入電影界，現年26歲的她成為90後影壇生力軍，從此決心將演員當成終身職業，日前她在訪問中說：「電影有種好吸引嘅魅力，有份喺片場都會覺得好正。」大學主修廣告設計的她，本身沒有任何演戲經驗，所以接拍第一部電影時，坦言也沒有甚麼信心，曾忐忑是否應該走上演員路，但第一部電影令她有份入圍金像獎「最佳新演員」，事實證明她沒有揀錯路。
女女咀提高底線
下月陳漢娜將有另一部電影《墮落花》上映，以毒品為題材，更為大銀幕獻出第一次 ，與溫碧霞有不少對手戲，並有大膽的「女女」咀嘴戲份，「我第一次同女仔咁激烈咀嘴，對手仲要係前輩級，所以一開始都有啲驚。」她笑稱當時睇劇本，完全想像不到畫面如此激烈，「由身體開始錫到去嘴唇，因為係女仔又未試過，所以係好新嘅嘗試同挑戰，但拍完之後覺得效果幾好，之後接角色嘅底線應該會越來越高。」
演員熟讀劇本是基本，但對於詮釋角色陳漢娜卻有另一番睇法，「演員都有自己嘅創作，每個人嘅特質同思考方式，可能同導演、編劇當初設計角色有偏差，所以唔可以齋睇劇本，當我睇完劇本，我會根據性格同經歷諗呢個人平時生活係點，佢點樣食飯、飲嘢，行街嘅節奏係點，諗好多好似唔關事，但好微細嘅嘢，我又會寫日記去進入角色，想有多啲畫面，唔會背熟劇本，只要進入個角色，記得角色做啲乜，到時自然會知道個flow。」她更謂做演員，應該要演活另一個人生，甚至接觸現實不會發生的事，而且「由睇劇本到完成一套戲，成個人都好似成長咗，因為經歷咗另一個人生。」
陳漢娜又分享想嘗試有歷史背景的電影，「香港比較少，但外國有好多中世紀，或者戰爭時期嘅故事，因為我哋係現代人，嗰一類角色要study好多，你要知道佢哋嘅談吐、文化，同𠵱家好唔同，好想試吓唔係現代人可以做到嘅事。」將來有機會，她不諱言想嘗試做導演，將屬於自己的故事拍出來與大家分享。
懶講嘢得「厭世臉」
問到陳漢娜對於被形容為「厭世臉」的看法，她立即哈哈大笑，流露出率真、少女一面，「可能係我性格慢熱，見到陌生人我都真係幾靜，之前都唔覺，但後尾越來越多人講，發現自己有時都幾唔出聲，可能有時懶得出聲同講嘢，但我同朋友一齊，都可以好開心、好白癡。」
【東洋長相高辨識】
做演員之前，陳漢娜是模特兒，接拍過很多不同類型的廣告，帶點暗黑與東洋味的長相，為她帶來高辨識度與可塑性，得到不少品牌青睞，多次成為時裝騷座上客。這次的訪問拍攝，也是在她於巴黎睇騷期間進行，恰巧遇着氣溫急降，只有十度並下着毛毛細雨，穿上春裝表現出敬業一面。
陳漢娜形容巴黎是時裝愛好者夢幻的地方，「好多大品牌會喺巴黎行騷，我比較鍾意夜晚，夜晚嘅藍色好靚，加上睇完《情迷午夜巴黎》（Midnight in Paris），腦入面一直有嗰個畫面，當見到實景就會覺得好浪漫。」又說小時候已經喜歡上網看時裝騷，認為時裝是表達自己的方式，「最重要有自己style，着乜都係代表個人，覺得舒服、自在就係最好，好緊要feel good。」
更多精采時尚內容，盡在 http://add.appledaily.com。