建築邦夫婦與沙田陳太每星期六早上結伴到大埔墟街市買餸，前兩星期都撞到發哥，擦身而過，上星期六又在停車場𨋢口見到發哥，呢次咪走寶咯，叫住發哥，請發哥畀面影張相，發哥平易近人，接過建築邦手機，叫佢哋企好，發哥顯然係selfie高手，嚓一聲就影咗相，於是皆大歡喜而去。沙田陳太話一個國際級大明星如此唔擺款，平易近人，非常難得，抵佢家肥屋潤，發完又發，直情係香港之光也。
左丁山包拗頸：「如果係香港之光，香港就應該搵佢做代言人啦！點解成日搵成龍？」沙田陳太居然識得學彭斯講：「人見目前，天見久遠，發哥來生會做幾次奧斯卡影帝。」其實係閻羅王講嘅啫，即係叫人在世行事要留心來生報應，今生富貴驕逸，為銀紙唔講良心，來生會畀閻王判投胎為乞丐㗎！今生忠忠直直，廉潔不阿，而鬱鬱不得志之九品官，來世會封侯拜相也說不定，揮棍打得人多，打到人廢，來生做牛做馬嘅啫！
沙田陳太聽見，走去書局買馮夢龍《喻世明言》，買唔到，於是買咗馮夢龍之《醒世恆言》，食完飯就刨呢本小說，刨得津津有味。聽佢講起，左丁山在自己書架猛咁搵，卒之搵到，有上下兩冊嘅《醒世恆言》，約購於1980年。搵到本書冇乜驚奇，不過已經發黃，好似唔係幾衞生，或者都要買過一套台灣三民書局新版。但有大驚喜噃，就係在呢本發黃小說內，居然夾住咗五篇左丁山嘅舊稿件，真係發夢都估唔到，左丁山曾在明報財經版用另外一個筆名寫財經評論，呢次見到五篇舊稿，不禁大叫一聲，因為何其巧合也。1981年4月23、24日兩日寫滙豐股票（搵到舊稿第二日係滙豐宣佈2019年第3季業績倒退之時），另外有篇講高地價政策與租金管制不公，又係今日之時興熱門議題，過咗38年咯噃，香港人仍然以滙豐、地價、租管為議論題目，果然係五十年不變格局。左丁山寫之「談滙豐股票」，將1970年滙豐送股股息講起，至1980年共11年，如70年買入一手滙豐，至80年4月可累積得69574股，80年4月16日滙豐股價收市報14.9元，共值103萬元以上，歷年累積股息146557元，而70年買入400股成本會係116800元，十一年間免費成為百萬富翁！現在睇番轉頭，當年銀行盈利率驚人，長揸滙豐，一定成為富翁，唉，之不過，人見目前，天道見遠，今日21世紀做滙豐股東邊有呢支歌仔唱！