【生意跌九成】
【本報訊】前晚Halloween，蘭桂坊被警方「接管」，一年一度的狂歡夜，演變成又一個打市民、打記者的中環黑夜。酒吧提早關門，客人定單被迫取消。警方辯稱封鎖蘭桂坊是因有人「打着萬聖節旗號」惡意堵路，酒吧負責人則反斥「堵路嗰個係警察！」怒指「警察唔嚟就冇事」。
記者：梁嘉麗
蘭桂坊「軍管夜」翌日，蘭桂坊協會總監張素媚接受電台訪問稱，警方前晚進入蘭桂坊對酒吧生意是雪上加霜，有早已預約的客人臨時取消定單，甚至有店舖即時以回贈100元促銷，依然門可羅雀。施放催淚彈後，整個蘭桂坊更濃罩着強烈刺鼻的氣味，有商戶為保障客人及員工的安全決定提早關門。
警察公共關係科總警司謝振中昨辯稱有人「打着萬聖節旗號」惡意堵路，又有人向警方扔雜物，警方才警告有關人士涉及非法集結。港島總區高級警司（行動）吳樂俊指近月有不少公眾活動演變暴力場面，當前晚旺角一帶發生暴力，又有人由維園遊行至蘭桂坊及現場有20至30人戴上V煞面具高叫口號，「唔肯定呢班人有冇暴力傾向」，故決定在7時20分左右通知蘭桂坊協會，需要封閉蘭桂坊，協會亦同意此決定。
駁斥警講法：市民冇堵路
於蘭桂坊開業的本地手工啤酒Watering Hole負責人Jesse駁斥警方，當晚市民並無堵路，「堵路嗰個係警察，明知多人仲要set水馬，真係極荒謬。噚晚人流大概同平日周末差不多，唔係特別多人，唔明所謂人潮管制係想點」。他指警方聲稱市民非法集結，原因無非是警方封鎖蘭桂坊，「好似等車咁，車未到自然會有人聚集，大家等緊入嚟，聚咗人你就話人係非法集結？」
警方以有人叫口號為由懷疑群眾有暴力傾向，Jesse認為警方未有分清因果，「個時序係防暴出現，先有人嗌口號，因為20人而封路？而唔畀成千人上嚟？諗吓都知唔合邏輯」。
「佢哋當晚8點突然封晒啲路，唔畀市民入嚟，所以開始有對罵。啲客都係想入嚟飲酒，你封晒無意義，警方藉口話蘭桂坊開始多人，要保護我哋安全、驅散人群」。他認為蘭桂坊於萬聖節晚人流多是常態，卻因為警方禁止人們進入，才會發生衝突。
前晚10時後，警方發放催淚彈，氣味快速傳至整個蘭桂坊，Jesse跟客人立即進店內暫避，在店外他亦放置幾箱水，好讓人們洗眼。其後防暴在街上巡邏，「佢哋喺我店前用電筒強光照我同啲客，行行企企咗一輪，然後走咗。我本來有好多booking，真係好嬲」。他表示因為警方禁止市民進入蘭桂坊而損失了九成生意，令他非常憤怒。
當晚至午夜12時後，才陸續有人突破糾察防線進入蘭桂坊，Watering Hole亦開始熱鬧起來，「冇警察就冇事，大家都係嚟玩返晚箒，呢度又冇中資店，點會有人破壞啫？」
蘭桂坊苦主還有在街邊擺檔幫人化妝的Sam，前晚他不斷被警方驅趕，先在蘭桂坊，然後被搬到和安里，再搬到石板街，「化到十點幾，聞到催淚彈味，不斷咳，警方佈防不斷伸延，我哋最後喺十點半都被趕走」。
Sam覺得很無奈，生意比去年大減五成以上。對於警方說當天有人非法集結才封鎖蘭桂坊，他認為這裏每逢節日都多人，難道日後聖誕節、除夕人流多的日子都算非法集結？
