【港故事】
舊人常說知識是力量，但吸收方法及過程已變，新生代只愛用iPad讀電子書及網上查字，實體書被視為「阻碇」，寧送進堆填區亦不願長留家中，偏偏有一個人矢志成為「救書特工隊」，只要有人來電，便會專程駕車往回收舊書，再翻新出售，守着上兩代人承辦60多年的「精神書局」初心，不斷度橋推廣二手書文化，希望有一天「識佢係書局揸fit人多過童星」的黃寶龍。
記者：莫家文
攝影：劉柏麟
擴大客源 親自上門收書
現年39歲的黃寶龍（Sam），走在街上偶爾會被人問：「咦，你係咪演過《大時代》劉青雲童年嗰個方展博？」尤其該劇早前深夜翻播，「被認出」機會更常見，不過他走進逾60年歷史的精神書局西環分店內，熟客視他是負責人，只會問：「幫我留意呢本舊書」，多過話「你係乜乜乜童星」。
演戲只是人生過場
對Sam來說，演戲是人生過場，書局才是阿爺留給他的財富。書局的源起，是爺爺早年由旺角街頭開書攤及推木頭車賣書，1958年開始通菜街上舖，其後因加租問題，2002年遷往北角，翌年再在西環屈地街開分店，Sam直至2012年才正式全面接手。「咁啱有做咗好耐嘅伙記唔做話要湊孫，我開始返嚟幫手，先發現書局面對租金人工壓力及閱讀人數下降，唔夠穩定經營落去，我開始醒覺要做返啲嘢。」
大部份時間從事時裝及洗衣店生意的Sam，年幼時看着父親被一堆書團團圍住，對書本基本沒有好感，反而成年後在外打滾多年，回流才發覺書本可貴。「呢幾年香港人看重本土文化，好多講香港情懷嘅舊書如《香港掌故》，內容講述香港街道同歷史由來，一拎出嚟就有人想買。」他拎起該套書集娓娓道來。
既然全身投入，Sam決定借助多年生意經驗，幫助書局增設不同渠道拓展客源及收書途徑，包括開設fb專頁，網上親自與網友溝通，擴大回收舊書的途徑及層面。「多啲書友知道有二手書店回收舊書，唔係淨係當做廢紙賣，店內收書查詢立刻多咗。」Sam親自駕車上門收書，發現近年舊書回收有很大變化。「6、7年前啲人仲會問收書咩價錢，近幾年係你肯上門收書就得，佢哋唔介意送書，前提係要收晒佢，所以我都係收晒入倉再分類。」
書中尋寶 最大樂趣
印象猶深的一次，是多年前應一個業主的要求，到一個單位內收書，當時他入門一看嚇了一跳，「啲書密密麻麻，書架高過一個人，有啲一層書架堆咗四叠書。」結果他用了整整三日，召來密斗貨車，先後搬動超過一千個紅白藍膠袋，才完成整個搬書工作，估計至少有五至六萬本藏書收回倉內，逐一用消毒水抹書後才定價上架，「我𠵱家都唔知開晒箱未。」他笑言。
Sam不諱言，即使想救書亦有其限制，「如果係蛀得太犀利嘅舊書，又或者係長期放喺地下，書紙受潮吸入濕氣，最終只能放棄。」他亦因西區租金升幅太高，西環舖4年前由大街搬入小巷，幸街坊及熟客不離不棄，加上新業主願意提供較廉宜租金，才讓書局繼續營運。
對他而言，最大樂趣是書中尋寶。若然是民國初年的舊式線裝書，一般較容易認出，不過更多珍貴舊書是考眼力表現，看看是否能夠「執到寶」。「呢本牛仔畫集好少見，細本見得多，咁大本合輯喺80年代出版，做咁耐都係第一次。」他又在舊書中無意間發現夾雜一批以漫畫幽默表達藝術、政治及文化的19世紀法國報刊「Le Rire」（中文譯作笑聲），歷史超過一百年，保存良好，成為另類珍藏。
有時這類藏書萬中無一，不定時上架，Sam認為這才是二手書店的魅力。「上網搜書打個keyword就搵到，但二手書店最吸引人嘅地方，就係入嚟唔知帶到咩書走。」
不介意客人打書釘
近年他積極推廣二手書文化，包括與非牟利組織Free Foundation合作，在商場擺設二手書攤，以低於書價一半出售讀物，今年中又捐出大量教科書及兒童書予「陳校長免費補習天地」及小學，精神書局西環店亦有提供日租單車服務，部份車租可抵銷書價，當日免費取走或補錢換書，為的只是繼承爺爺營辦書局的初心，「佢話當時嘅人餓到三餐不繼，廉價二手書成為貧苦大眾嘅精神食糧。」
回顧接手書局後，Sam指「有啲月份蝕，有啲月份有盈餘，賺蝕都係五位數以下，情況唔算嚴重，仲可以撐住。」他最希望大家知道香港仍有二手書店存在。「其實我唔介意客人嚟到幾個鐘打書釘，至少佢有睇過書。」在「三中商」（三聯、中華、商務）佔據大半巿場份額的情況下，堅持破風而行，更顯難能可貴。
港故事
有些人有些事，越是美好越留不住。本土手藝、傳統行業、街頭老店，都帶給我們生活的溫度和記憶的厚度，如果你知道有這樣的故事，歡迎提供。（致電或WhatsApp 6383 6568 註明「港故事」）。