黃淑儀（GiGi姐）前日秘密入院，做全膝人工關節置換手術，將左膝蓋骨鋸走，更換金屬全膝，預計停工三個月休養，半年後再為另一隻腳換膝頭。GiGi姐與友人分享病況，傷口長達近四吋，而GiGi姐老公徐景清除了陪老婆入院，還親自送上住家飯。
GiGi姐受訪時中氣十足：「醫生叫我過兩、三日後先好落床，但我唔得喺床去廁所，就自己試吓，加埋止痛藥力過咗，開始有啲痛。」她透露四年前為無綫拍攝《吾淑吾食》期間半月板突然撕裂，劇組人員立即送她去急症室，她說：「嗰時醫生已經叫我立即開刀，但我第二日要返溫哥華，我每次返港都有覆診，只係近年越來越嚴重，唔做唔得。」
採訪：嵐山