【本報訊】35歲的何富榮是旁人眼中薪酬優厚的金融分析師，去年底卻遷入吳淞街做劏房戶，住所旁的垃圾站飄來臭氣、能夠細數老鼠出沒：「真正住落嚟，先至體會到呢區居民嘅感受」。不滿政府無理DQ民主派，何富榮去年初參加港大法律系副教授戴耀廷發起的風雲計劃，6月正式辭職備戰。這位80後風雲戰士準備在佐敦劏房圓大夢：與街坊同行，踢走保皇黨。
「到𠵱家都唔相信（四名議員宣誓後被DQ），因為真係太過份」。何富榮2015年畢業於理大會計及金融系，其後在理大修讀科技管理學碩士。傘運可算政治啟蒙，「開始多啲關心政治」，8.31落閘封殺雙普選固然令他不滿，但9.28竟然出動催淚彈驅散，「真係有啲出乎意料之外……當然今日可能就係家常便飯」。
阻民建聯自動當選
去年初有參選念頭，因為2016年的四名議員包括劉小麗、羅冠聰、梁國雄及姚松炎被DQ，「成個宣誓可能真係一個字走音（羅冠聰），咁就可能判決係唔尊重誓詞、成個議席冇咗，到𠵱家都唔係好接受到。」他指傘運後不少港人對社會運動非常冷淡，「冇人去做嗰陣，我想做多啲嘢」。去年參加風雲計劃，接受培訓，揀選佐敦北落區，因為這區的民建聯楊鎮華有可能自動當選。不想空降，考慮到此區居民不少居於劏房或籠屋，原居於沙田中產屋苑的何富榮去年底遷入區內劏房，親自與居民同呼同吸。
「大家真係忽略咗區議會呢個戰場」，何強調，每年區議會撥款款項不少，必須監察是否用得其所、有否利益輸送，相信其專業背景對小白象工程的審批更具洞察力。同樣不可忽視的是區議員是立法會議員的樁腳，也在特首選委會中佔具影響力的117票。回歸參選初心，無非力抗盲批撥款、盲撐政府的保皇黨，「睇到佢哋做咗好多錯事」，單是反送中運動，「（民建聯）由支持提出到不斷盲目支持，睇唔到有幾多人真正用心負責任」。
楊鎮華上屆區選雖以941票、近七成得票率擊敗地盤工人、傘兵戚志良，但今年此區新登記選民佔17.5%，似乎為民主派帶來一線生機，何富榮直指不少市民向他指：「終於有相同理念人士出嚟選」，當然亦有街坊知道他是民主派後，「喺我面前撕爛我嘅單張」。
■記者許偉賢
