黃又南和徐天佑同年出世，以男子組合Shine出道。不過天佑近月對政治表態，9月時曾在個人社交網留言：「no more shine」，惹來二人拆夥疑雲。日前Shine為電影《再見UFO》在銅鑼灣接受《蘋果》訪問，二人要分開受訪，並不諱言會各自發展。然而這對相識、相遇18年的兄弟，仍互相扶持，並向對方說聲︰「支持！」
撰文：羅婉玲
攝影︰陳俊強
已36歲的徐天佑和黃又南，2001年出道組成Shine，停止活躍多年後，二人去年再在紅館開騷。不過天佑早前積極為社會運動發聲，曾在facebook出post表示與香港人齊上齊落、不割席。有人留言問他：「Shine是否都齊上齊落？」天佑卻爆出一句：「no more shine.」其後再貼文：「壞人當道，我係一個好人，如果我瀨嘢，希望你會相信我係一個好人。」又留下一句「暫別」，疑似宣佈拆夥。新片《再見UFO》近日選為「香港亞洲電影節」開幕電影，二人為新戲宣傳，卻要分開接受訪問，看來已確定各走各路。
「講得好白」
問到又南對此看法？他說：「呢啲都係交畀公司評論，其實年頭我同天佑都有諗係咪停一停呢？天佑想玩自己嘅音樂，我想專注拍戲，各自做自己想做嘅嘢。其實『no more shine』只係一個詞語，只係冇開個記者會去交代。」談到合作18年，雖然大家立場和理念不同，但又南仍支持對方說：「絕對會，朋友都會，何況我哋識咗接近20年，我相信天佑都會。」
另一邊廂的天佑對發表「no more shine」，他謂：「我答過喇，其實我喺社交網都講得好白，係白色個白。公司都回應咗，我再答只會係唔尊重公司。」當他得知又南支持自己時，天佑笑說：「係咩！」但他也表示會支持對方。
好迷UFO
相隔17年再跟蔡卓妍（阿Sa）合作，不過三人同場戲不多，天佑說：「我記得拍《這個夏天有異性》第一次識阿Sa，大家都唔知乜嘢係演戲，日日都好好玩。今次睇到佢有場喊戲，佢成熟咗，演戲好認真。」而又南表示三人只有兩晚同場：「雖然大家分開咁耐再合作，無論消化劇本或者演戲，大家一埋位就OK，過程拍得好順。」
對於以UFO作為題材，二人均叫好，又南說：「我信㗎，宇宙咁大，一定有外星人。當年解剖外星人，我全程都唔敢睇，想搵人陪我睇。」至於天佑不但相信有UFO，他更將這元素加插在其小說中：「我好迷，當然我自己未見過，但曾試過見到天有啲光，懷疑過係，我都好想見吓。」
場地提供：R One