出席中一家長日，一位媽媽舉手問：「女兒最怕中史科，點算？」
怎可能？在筆者讀書的英中為主年代，中文和中史是僅有用廣東話的，尤其中史科當聽聽故事，親切感滿載，何來壓力？
先否定那位媽媽在扮假洋鬼子曬命，不會這般無聊吧。
猛然醒起，回歸後，中文科矯枉過正，慘變普通話教，其他除英文科外，強逼母語教學，論親切感便不限中史專美了。仍唸英中的尖子，從幼操得雞腸流利（否則怎Band 1），無語言隔閡，中史先天優勢遂不再存在。
這還只是表相，孩子本質上也無興趣了。作為家長，記得嗎？幾十年前，我們啟蒙讀物是兒童版《三國演義》和《水滸傳》，稍長一點輪到金庸，雖屬小說，但充滿中史氛圍，很容易投入古人如何爭天下、官逼民反、保家衛國；換轉如今，主流兒童讀物變《Harry Potter》，順手練埋英文，那些古堡、巫術，投入History氛圍多些囉。
現場，老師解畫道：「中史堂上有很多互動方法引導同學……」我心想，當年哪用啊？譚炳文係紂王（《封神榜》），吳啟華係劉邦（《楚河漢界》）、隋煬帝（《大運河》），苗僑偉係李世民（《決戰玄武門》），劉德華係康熙（《鹿鼎記》），每課每章像見到熟朋友，感覺返嚟，與劇情接軌，自然讀得過癮。真的，TVB曾經湊齊成套中國通史啦。
現在？大台幾耐無拍過古裝劇？某退休監製告訴我，原因竟是──無得植入廣告，聖上點用紙巾點食藍莓素呢？便少拍為妙，如此荒謬如此現實。至於ViuTV和開電視，古裝要靠多年積累大量戲服、頭套和道具才搞得成，新電視台欠底子，潮流又已經唔興，更無謂趕這趟渾水了。
播得少，連帶藝員少薰陶，演來甩甩漏漏，同朕check吓，觀眾睇得火滾，愈不受歡迎愈收皮，惡性循環。
不得不佩服，NHK由1963年起，堅持每年一套重頭長篇大河劇（取自法文Roman Fleuve歷史長河之意），未計同類製作，的確起到影像教育、寓文化傳承於娛樂的效果。去東瀛旅行，大阪城、名古城等古蹟，融入都市生活，毫無違和感，去大陸會不會？根本，撇開價錢，誰衷心覺得返大陸好玩過日本？港人帶子女放假遊埠，首選日本，又係History氛圍強於中史氛圍囉。
靠香港影劇沒希望，於是靠國產？《走向共和》、《我和我的祖國》之類？阿爺就係引你咁！洗你腦。不了，我寧願孩子知少些，最怕他們知錯晒。
所以，我想舉手代答那位媽媽：「其實呢，中一中史科主要講上古史，據DSE詳近略遠的方針，佔比重不高。而且呢，DSE咁多科之中，以中史科對海外升學無幫助，諗諗也明吧，建議中四選科時別要選。既然總有一科成績較差，應該慶幸，貴子女差在中史，還得神落……」
（隔星期六刊登）