【爆相爆片】現年57歲嘅曾偉權近日喺無綫劇《牛下女高音》飾演合唱團成員黑仔，原來佢月前肺部免疫系統出現問題，雖然唔使做手術，但要食藥控制。讀者李先生日前透過「爆相爆片」，直擊曾偉權一支公喺土瓜灣買飯，唔只身形瘦咗好多，個樣頗憔悴。
李先生話：「嗰晚佢一個揸車落土瓜灣間食肆，買咗盒叉燒飯同一杯飲品外賣，個樣有啲憔悴，同近期電視見嗰個樣唔同，明顯瘦好多，又冇咁精神，佢買完盒飯之後上車，點知好快又落返車，再買多盒飯至走。」
曾偉權99年因為大馬女藝人葉麗儀介入，同拍拖13年嘅梅小惠分手，但新戀情維持3年又分手。多年嚟曾偉權身邊有個契妹「波兒」照顧佢起居飲食，當晚曾偉權買多個飯盒，唔知係咪買俾契妹呢？
噚日曾偉權喺將軍澳為《牛下》宣傳，問到佢病情時，佢顯得好避忌，話個病要定期覆診，但唔方便透露太多︰「𠵱家休養緊，但病情唔想講太多。」佢話因為要休息，所以只能客串，問到會否影響收入？佢無奈話︰「冇辦法，因為健康行先，梗係有取捨。」
停接劇集
曾偉權話暫時唔會接劇集︰「會做啲出面嘅嘢，但唔會拍劇，雖然出面拍劇冇TVB咁辛苦，但時間都係長，唔考慮住。」佢話《牛下》班底計劃緊登台︰「一路都plan緊，傾緊雲頂或北美，希望有得做啦。」