福仔起孖　紅魔再度拆車

【綜合英格蘭外電】周三英格蘭聯賽盃另一場16強大戰，由車路士主場迎戰曼聯。作客的紅魔先有拉舒福特射入12碼領先，但易邊後車仔靠巴舒亞伊的妙射追平，惟其後拉舒福特再射入靚罰球，最終於史丹福橋以2:1擊敗車路士，各項賽事錄得作客三連勝。

車路士今仗續有上周末聯賽連中三元的基斯甸普列錫擔任正選，與赫臣奧杜爾分居兩翼，而曼聯則有拉舒福特及丹尼爾占士聯手攻堅。戰至上半場24分鐘，丹尼爾占士憑速度壓入禁區博得馬高斯阿朗素犯規，球證直指12碼，上周末於聯賽宴客的福仔，今回一射中鵠，助紅魔先開紀錄並領先上半場。

易邊後主隊搶回不少攻勢，其中奧杜爾於禁區外勁射僅僅高出，不過在61分鐘就有巴舒亞伊於禁區外推橫，邊走邊射下射破羅美路的十指關，助球隊追平。可惜在12分鐘後，福仔主射二十多碼外的罰球，以一記落葉球墜入龍門左上角，車路士門將韋利卡巴尼路欲救無從，最終紅魔靠此入球鎖定勝局，以2:1淘汰對手晉級8強，亦成功終止對手各項賽事七連勝的走勢。