香港警察不斷挑戰港人底線，就連萬聖節前夕都要搵機會辣㷫市民，噚日下晝喺facebook以「10.31哈囉喂×太子站 8.31」為題出文加兩幅漫畫，用個虛構故事想為自己平反。畫中有一個造型貌似madam嘅人物「心寧」，話自己萬聖夜放工趕地鐵，見到太子站B1出口有一大班人聚集，於是上前問個究竟，然後有着長袍男人解釋係向「831死去嘅義士獻花」，心寧就質疑「如果真係有人死咗，點解冇人出聲嘅？」，搞到獻花男啞口無言，心寧仲懶醒咁話「謠言止於智者」，而漫畫底部加上句「一個人喺香港真係可以人間蒸發冇人知？」
呢個挑釁post唔使半日輕鬆獲個過萬網友派嬲，逾萬留言亦都群起怒插，漫畫雖然話心寧美貌與智慧並重，但八方只係覺得佢常識同資訊欠奉，以噚日為例，黨鐵一早宣佈太子站下晝2點關閉，心寧仲想去趕車？小心現場食tg好過啦！
虛構人物趕搭已收工黨鐵
就算平日黨鐵都經常提早夜晚10點收工，心寧係咪有份罷坐所以唔知呀？事實上，8.31事件發生咗成兩個月，佢都可以唔知太子站外發生乜事，實有理由認為佢根本唔係香港人，又或者從來唔留意香港事，既然係咁，就一定會知冇人出過聲囉！
李八方
