90後Eric（化名）花逾百萬元創業，原以為對住太子港鐵站賣奶茶是個生金蛋的地方。逆權運動以來，警署大光燈直射舖頭，警察驅趕街坊，港鐵封站；9月份生意額急跌九成，「舖」命攸關的周末周日「開飯日」；如今變「食彈日」，收入由原本數萬元慘跌至每天一、兩千元。就算業主減租逾三成，仍要蝕住做。
記者：陳家雄
從事金融業數年的土生土長香港人Eric，賺到一筆錢，覺得工字不出頭，認為珍珠奶茶前景好，擲逾百萬元以特許經營權開辦「東喜茶」。選址太子港鐵站B2出口人流旺地段，去年底以月租逾10萬元租約300方呎舖位，目標一年回本，經營三個月已收支平衡。人生首次創業，面臨時代革命，「6月嗰時，老實講對我舖頭影響唔太大，客源都係上班族、打工仔，生意唔係跌好多，可能跌一成左右，撐到落去」。當時他很樂觀，「覺得捱過6月，應該好快見到明天，冇諗過搞到呢個地步」。
在警署旁經營是負累
店舖正門及後巷裝置閉路電視，他說有警察要求交出CCTV片段，但他說不知怎的，閉路電視鏡頭被封了。一街之隔是旺角警署，「呢度距離警署不足10米。但我想講，喺警署隔籬做生意，如今可以話變咗負累！」
過去數月，警察行動歷歷在目，「好多時見警察清場，我見到都係街坊，冇佢哋所講嘅攻擊性武器，警方濫用武力。夜晚成日用盞好大嘅強光燈照人，一照就照正我舖頭。巡邏係叫啲人唔好逗留，幾個人逗留就話非法集結。同市民講嘅嘢，粗暴！難聽！呼喝市民，叫啲人行開，唔理你乜原因」。「最難過一定係8.31，嗰晚我睇到港鐵職員匆忙拉閘，即刻叫住長沙灣嘅同事收工，驚佢冇車返屋企。我自己返到屋企就睇到，可以話係悲劇。即刻打電話畀同事，好彩佢已返屋企，佢話坐喺出事列車前一、兩班車。原來最基本安全返到屋企都唔係必然」。
Eric已賣魚蛋燒賣救命，珍珠奶茶又由30元減至26元，7月更請求業主減租，「佢唔係乜大業主，長期喺內地。佢第一個反應係指啲人收咗錢，背後黑金政治。我聽完，無奈！8.31係太子嘅轉捩點，焦點落嚟呢度，佢睇到新聞，見市道唔掂，就減租三成」。
業主減租，Eric謝天謝地，然而，「原本以為減租，就已經幫你度過最緊要難關，但因為港鐵封站，生意越來越難做。（重陽長假期）連續三日封站，成條街係死城。一般紅日收入五位數，一封站跌到一、兩千蚊」。
「9月開始，港鐵開始不斷封站、提早落閘，呢度變死城，生意跌九成呀！其實佢現在好似幫緊政府戒嚴，令小市民唔敢出街。今個月頭，8點鐘閂站，啲人啱啱收工就要即刻返屋企。成日咁搞法，冇得做落去」。Eric不滿港鐵，「唔係一間真係幫香港人嘅公司，係幫政府達到政治目的，不斷戒嚴。提早閂閘，製造社會恐慌」。他指上月營業額是開店以來最差，每月收入跌至六位數邊緣。位於太子道西旁、對正旺角警署的地舖，至少有兩間時裝店掛上「租約期滿結束營業」。在東喜茶旁，鄰近太子站B2出口的太子道西157號地下13號舖，建築面積約530方呎，8月開始丟空至今，丟空前月租8.5萬元，但業主竟叫租9.5萬元。
港鐵閂站 生意跌九成
Eric認為最大責任在政府，「冇回應市民訴求，去到如今地步，完全係林鄭同佢班子嘅決策失誤。現在更去到蒙面法，不斷打壓我哋應有嘅集會自由」。店舖晚上有時播《願榮光歸香港》，「開頭諗會唔會有其他陣營嘅人入來理論，但未發生過。而原來太子好多唔同年齡層街坊，都會出來發表政治訴求。（對面係警署都照播歌？）驚㗎，但冇理由驚就唔做。有次清場，示威者入來提我哋，警署舉咗黑旗啦，就嚟放催淚彈，都會提醒我哋關門。示威者係和平，唔會亂咁破壞小商舖」。
Eric強調：「我唔係消費緊呢個運動，對我哋小商戶嚟講，呢個環境已經冇任何生存空間；對香港人來講，命運已經連結一齊，勇武又好，和理非又好，唔可以獨善其身，不割席，不篤灰。前路唔多講，大家都估到我哋小商戶結果會係點，星期六、日生意額跌九成，小商戶遲早都會執笠」。
