【娛樂人物】港產Rapper Heyo早在九年前的作品《人民公僕》歌詞中，描述當時他眼中的警察，但料不到竟如預言般講中今日警方的行為，Heyo直言現實比歌詞所形容的更差更荒謬。本月中他在亂世中開騷，在港土生土長的菲律賓籍Rapper JB亦會參與，在這時勢他們覺得更要用力寫歌，希望透過歌曲為弱小的港人發聲，以及記錄當下實況。
撰文：曹家誠
攝影：林賓尼
在2010年的作品《人民公僕》中，Heyo所寫的歌詞提到「喺香港畀差餉係用嚟抵制人民，良知已被收賣，良心已被收埋，當人民用聲音去申訴嚟燃燒憤怒，只得到恃勢凌人同一臉胡椒噴霧」，正是現今香港寫照，驚嘆Heyo的預言能力和視野。現年31歲的Heyo，18歲出道，日前他在觀塘接受《蘋果》訪問：「九年前寫呢首歌係講當時嘅香港警察，但𠵱家睇落，佢哋都係一樣冇變過。就好似LMF寫嘅歌，二十年前講嘅嘢到𠵱家都一樣，都係冇進步過。」舊作成為香港預言書，Heyo嘆喟：「真係唔想咁㗎，但𠵱家嘅情況比當年寫嘅更差，所以我哋更加要繼續寫，去記錄𠵱家嘅香港發生乜事。」
斥政府離地
本月12日Heyo會在麥花臣舉行演唱會，菲律賓籍Rapper JB亦會出現，身邊好友對在這環境下開騷感愕然，但Heyo自覺是文化界一分子，有必要為香港出一分力，即使逆權運動越演越烈，仍願意做勇者：「今次都算係一場文化運動，加上市況淡，唔少朋友話冇嘢搞，咁就搵啲嘢搞吓啦，可以搞起個文化，加上政府咁弱勢，我哋更應該透過今次去證明自己可以做到啲乜。」
Heyo認為香港現在有很多問題要修正：「樓又買唔到，仔又唔夠膽生，講教育又追唔上歐美國家，我哋講到尾都係願景希望香港會好。」特首林鄭月娥發表的施政報告，「疑似」為香港人帶來一些願景，Heyo冷笑謂：「呢個係佢嘅願景箒，嚟緊嗰十年都可以借800萬返嚟供層樓，呢個就係佢提議嘅願景，我當自己冇睇過算。」Heyo指有如此離地的政府，更加需要發聲，不停凝聚大家的力量。
推內地節目
年輕人近年對Hip Hop音樂不再陌生，Heyo的作品更影響不少年輕人；同時跨界別跟不少主流音樂單位合作，包括衛蘭、衛詩及樂隊Kolor等，他稱：「好多主流嘅歌手私底下都會聽Hip Hop，呢樣嘢喺美國根本就係主流。做生意都係睇數目字，發現Hip Hop多人聽，點擊率高咁咪願意做囉，主流係點定義？多人聽咪主流囉！」
早年，中國興起Hip Hop文化，結果相關的選秀綜藝節目一個接一個，但Heyo及JB卻稱無意把握這個14億人的市場機遇，JB自爆兩次拒絕邀請：「佢哋參賽需要rap普通話，一來我唔叻，其次唔係熟悉嘅語言，唱出嚟都唔舒服。」Heyo則感到此類節目內定成份好高，更揶揄睇內地的嘻哈節目，倒不如睇美國有嘻哈好過。