前港姐翁嘉穗有個一舉成名的19歲大仔鄔謨雲（Jason），閒閒地可舉起100kg，17歲時已在美國健力舉重比賽打破世界紀錄。Jason早前回港在東華三院打暑期工，志在最短時間整靚CV。Jason首次接受傳媒專訪，興奮到無時停，腦轉速、講說話快到一個點，「我下個目標係22歲破世界紀錄。」大學未畢業，已經滿腦子未來生意經，偶像是爸爸鄔友正、Bill Gates和Telsa老闆，假想敵是Ikea。「即係，你唔係要學由一億變做一千億，而係要學點由零變做一！」年少輕狂冇問題，敢想及實踐已是行出成功的第一步。
撰文：林妙萍
攝影：周樂恒
「響呢度做intern學咗好多貼地嘅生活，好似有折扣嘅西餐廳，好慳錢，好正！我估唔到40蚊可以係一個餐，一杯嘢，再加埋甜品，真係好抵！」鄔謨雲在東華三院總局大堂做訪問，他一見同事經過就主動打招呼，富二代打暑期工先要學識和人相處，不要堅離地。
理想篇
「我做咗好多份暑期工同intern，希望做靚份CV，將來畢業搵份好工，高人工啲，唔使做9至11嗰類ibank。我嘅目標係可以搵夠錢讀大學，唔使爹哋媽咪幫，第一步係拎全數獎學金，就可以去讀碩士，再轉去哈佛、史丹福讀。」Jason在美國西北大學商科才一年級，任何長短假期都盡量填滿活動，心急成長自立，因為想和父親一齊做父子兵打天下。
爸爸鄔友正是Jason人生導師，爸爸的教誨他全部視為人生聖經，「老竇話人生要記住五大成語，只要做到一瓣就橫掃。第一，驕兵必敗；第二，欲速不達；仲有知人善用、精打細算，第五個就keep住做秘密先。」爸爸叮嚀他學做生意前先要學做人，由低做起打好基本功，他努力儲定彈藥做接班人，「可能你唔憂搵食，但你要諗點樣將生意發揚光大。我們唔係要諗令一棵樹，定一千棵樹嘅葉好茂盛，而係要研究點樣得到種子。」他希望靠自己行出另一條創業路，目標是十年內搵到第一個億。
舉重篇
Jason出生時只有六、七磅，父母愛運動，自細安排他學游水、打網球、排球，亦跟葉問門下弟子學詠春，強身健體。16歲時參加「香港健力錦標賽2017」獲得青年組冠軍，並打破三項香港健力舉重紀錄，之後在美國打破過世界紀錄，去年再創下三項香港健力舉重紀錄。Jason愛上舉重，全因唔輸得，「2016年時，有個best friend好細粒，朋友個個都笑佢，但過咗一段時間，佢個人突然嘭嘭嘭，好爆肌。我自細已經大隻，有次我同佢拗手瓜，輸到仆喺度，然後我去同佢做gym、鬥舉重，又輸幾條街，所以我要操返啲嘢，挑戰佢。」15歲首次正經玩舉重，一舉就舉到235磅，嚇驚教練及PT，無意間發掘了自己的天份，「媽咪最初唔鍾意，佢覺得我唔夠高，驚我變tube，哈哈哈哈！」旁邊陪住做訪問的翁嘉穗更正只是怕囝囝受傷，「我試過拉傷，但唔係舉重，係打波，因為我打波會亂嚟。我鍾意舉重，因為好有規律，舉重係可以好常規化，你呢個動作要做幾多吓、幾多套，warm up做乜，做完gym後食啲乜，全部都有數得計，可以跟住做，我出街食飯係帶埋個磅出去。」聽來容易，能夠切實執行亦講求個人約束、強大意志。成年之後，他的下一個組別是19-23歲，「所以我下一個目標就係22歲破世界紀錄。」
愛情篇
有說，每個男人的第一個情人都是媽媽，剛成年的Jason都一樣，「我細個話過要娶媽咪做老婆。」45歲的翁嘉穗保養得好，和五呎九吋的肌肉型囝囝不止多次被認錯為姊弟，更試過在越南的酒店被認錯是夫妻，「嗰次真係好誇張，𠵱家我冇拍拖，要專心學業，希望將來老婆都要似媽咪，有善心、有智慧，夠聰明可以教仔；外表當然唔可以太差，同埋對人要公平、要對人好。」
更多精采時尚內容，盡在 http://add.appledaily.com。