【廣告經綸】搵食,唔一定要出街 - 文廸晞

【廣告經綸】搵食,唔一定要出街 - 文廸晞

今時今日搵食艱難,做飲食業,更加難上加難。這一邊廂,誠哥出手,派幾億資助飲食業;另一邊廂港鐵又提早收工,比起以前,想出街食餐飯都唔係咁容易。然而,香港人最叻嘅,就係打逆境波,絕處都可以逢生。

社會動盪,除了上街,表達訴求,一般人都會減少出街食飯。如此一來,一眾外賣app大行其道。

據了解,喺香港嘅送外賣市場佔有率以Deliveroo為首,但好可能因為恃住佢嘅江湖老大地位,聽講有好多同唔同餐飲業品牌及優質食材嘅合作機會,一律都表現得相當保守,傾來傾去都傾唔成。相反,作為市場挑戰者的foodpanda誓要狙擊其競爭對手Deliveroo同Uber Eats,以Start-up心態,唔會吓吓計較成本,肯嘗試,咩都有得傾;更幫手撮合大大小小嘅餐廳同食材供應商嘅上下線合作夥伴關係,達至雙贏效果。

主戰場除咗停留喺幾個競爭激烈嘅因素,例如涵蓋嘅餐廳數目、送貨時間同價錢外,foodpanda更不斷提升服務質素、提供好用易用嘅app應用版面、擴闊付款方法,而且仲可以儲埋「亞洲萬里通」里數,又加送乾貨雜貨、肉類、酒類,全部承諾30分鐘內送到。

當人人冇得出街,盡量留返喺屋企,遇到一班朋友或親戚約埋喺某人屋企食飯嘅話,又唔想叫外賣或自己煮而可以等同有出街食飯嘅體驗,最近變得越來越受歡迎嘅,就係Mobichef、My Chef Anywhere等廚師上門幫你煮飯服務,既可以自由選擇地點、人數、午餐或晚餐,更可以廚師發板又或者自訂餐單,達至足不出戶,亦能享受餐廳質素和體驗。仲有專業侍應及餐後洗碗服務,價錢亦並非想像中昂貴,實現私廚平民化,走入尋常百姓家。

唔出街,一樣搵到好嘢食。

文迪晞
mailto:[email protected]