講開警察，最近警務處話要請成千個退休差人返去幫手，咁八方以為差人話晒係政府工，而且人工又高，退休應該有份唔錯嘅退休金，應該冇乜人會等錢使，要翻閹搵錢，但原來事實未必係咁，差人退休之後似乎唔少人都要再搵工，唔通佢哋真係好大使？
協會轉介做司機保安
原來有個香港警務處退役同僚協會，呢個會就明顯為退休差人提供服務同福利，其中一項服務係幫退休差人搵工，不過呢啲工唔係做交通督導員、家庭司機就係做保安，而且人工又唔算太高，而且話晒服務業，點都有機會受吓氣，𠵱家啲差人個個咁威武，可以見人就拉、又大大聲講做嘢唔使市民教，連特首見乜人好似要問過佢，退休之後又點鯁得落呢啲工？而且今時今日，有冇一般機構敢請退休差人都係未知數，事關PoPo形像有幾好，恐怕唔使八方多講。