捧紅MIRROR成員的ViuTV節目《全民造星》第二季的48強前晚誕生，他們將在第三回合進行小組對決，不過在節目尾聲，播出監製黃慧君（花姐）召見組合MIRROR，並在節目中宣佈：「我想你哋重新參加《全民造星》！」MIRROR的12位成員將加入《全民造星II》，48強成為全新的60強，之後他們會晉級或被淘汰。
希望有進步
MIRROR的粉絲得知消息後，紛紛表示不滿，花姐昨日接受《蘋果》訪問說：「其實我都有啲私心，因為我係呢個節目監製，又係佢哋嘅經理人，MIRROR出咗道之後，出去表演來來去去都係唱嗰幾首歌同影吓相，冇咗喺比賽時候嗰種咁大進步，我覺得開始有懶散同埋冇乜目標，既然𠵱家開咗呢個節目，MIRROR又可以幫到呢個節目，而且又可以幫到佢哋，所以咪安排番佢哋去比賽。」
假如MIRROR在比賽被out，會否令他們不能重返MIRROR？花姐笑說：「唔會喇，我嘅意思係好似教仔咁，如果你成績唔好，就唔畀你返屋企，事實上就算你俾人out咗出去，都只係想畀啲經驗佢哋，MIRROR就係MIRROR，好似有啲歌手去內地比賽，唔通輸咗就唔係歌手咩？」她續說：「當然佢哋喺過程可能會有啲難受，可能又要俾人再批評，或者又重新排名，不過呢啲壓力喺出面都會面對。」
過程會難受
至於有甚麼方法安撫fans，花姐則說：「繼續睇個節目喇，初初見到一定好心痛，不過慢慢會見到佢哋真係有進步，呢個係一個過程，令佢哋上咗一課。」
採訪：黃曉妍、魯吉