香港越亂，政治閒人鍵戰廢老689就越活躍，周一有傳媒行家喺克警記者會採取工業行動，689噚日就加把口挑記協機，寫咗幾百字質疑自由身記者身份，又話自己編過學生報同長時期投稿中外報刊，亦做過傳媒機構董事同電台電視台節目主持，所以都要申請張記協會員證喎！但呢個簽過記協《新聞自由約章》嘅人形object，其實自暴自己對香港傳媒業運作毫無認知。
記協：請提供新聞作品
689首先自問自答講反話「感謝葉嘉雯小姐提供答案」，但就將人哋個名寫錯晒，八方查過，呢個錯法同「香港01」一篇報道一模一樣，唔通689係忠實讀者？至於689質疑自由身記者係失業定半失業，記協可能見佢錯得離譜，就破例回應同勞煩佢自重，同時對佢打開大門，歡迎佢如果證明到自己以新聞工作為主要收入來源，又提供到近一年刊登嘅新聞作品，大可以填表申請做會員，記協會按既定機制同程序處理。
既然689咁口響又有自信，八方當然LM等睇689報名，不過記協就提漏咗689，申請做記協會員，要先搵記協會員做介紹人，唔知689搵唔搵到「假記者」幫佢呢？