眾志黃之鋒最終難逃被港共政權DQ命運，大家其實都心中有數唔太意外，但咁樣變相逼佢去打「世界盃」，共產黨隨時仲傷過畀佢入閘，而且今次DQ理由如同度身訂做，民主派就形容係18區選舉主任有18套DQ標準，有候選人支持嘅組織叫過天滅中共、詛咒包括國家主席習近平在內嘅中共死清光，呢個候選人竟然都入到閘參選，所以話DQ黃之鋒唔係政治針對真係冇人信。
蔡佳鏗天譴論過骨
其實喺提名開始，政圈已流傳講「光復香港，時代革命」係DQ高危，果然之後有人被選舉主任實行「思想審查」，但有人亦直接過關，反映標準根本無標準。
而接受「香港自治行動」支援參選沙田烏溪沙選區嘅蔡佳鏗，有國師陳雲支持，就因為「香港自治行動」喺fb講過「天滅中共 全黨死清光」而被問話，八方睇過佢嘅回覆，一邊解釋呢句係「宗教信仰的譴責詞，類似天譴」，一時話中共罪惡之大會有報應，然後又話呢句同《基本法》冇衝突，最後仲幫習近平打氣支持佢打倒美帝國主義，雖然冇咩邏輯，但就已經過骨。而佢同區參選人有爭取連任嘅獨立民主派李永成同民建聯吳卓璟。
究竟想「滅共」係咪仲擁護基本法同效忠特區？呢個問題八方唔係權威，但最少知黨大於國，沒有共產黨，哪有新中國？咁沒有新中國，《基本法》同特區就唔再存在，似乎呢位選舉主任會被進修國情啦，八方只好祝句好人一世平安。
李八方