曼聯今季成績麻麻，英超踢咗10輪排緊喺第7位，落後宿敵利物浦同曼城分別有15分同9分之多！不過曼聯球迷如果想搵啲安慰，英國《太陽報》呢個統計，可能會令魔迷帶嚟啲希望，事關《太陽報》話單計英超上半場嘅成績，曼聯居然同利物浦同得22分並列榜首，仲叻過衞冕嘅曼城㖭！
紅魔四場領先下失分
據《太陽報》嘅報道，假設所有比賽喺完成首45分鐘就結束，原來曼聯單計上半場成績，頭10輪係錄得7勝1和2負，比起全場90分鐘嘅戰績，3勝4和3負好得多之外，單計上半場嘅積分獲得22分，竟然同利物浦上半場嘅積分一樣，只係得失球差唔及利記飲恨做「阿二」，比起同市另一宿敵曼城仲要多一分呢！不過返番嚟現實，曼聯今季好多場比賽都係虎頭蛇尾，其中對狼隊、修咸頓、阿仙奴同利物浦嘅比賽，曼聯都喺上半場領先，但最終全數喺下半場被對手逼和，4場加埋足足冇咗8分，所以曼聯先咁慘排喺英超第七。
或者老一輩嘅曼聯球迷，從來都唔會擔心球隊上半場形勢唔好甚至落後，事關以前由費格遜爵士領軍，佢往往可以透過出色嘅調動能力同激勵球員鬥志，成功後上追和或反勝，甚至創造出所謂「費格遜時間」。但作為費Sir徒弟仔嘅蘇斯克查，似乎仲未學滿師就出山，搞到𠵱家紅魔鬼成日有頭威冇尾陣，如果蘇B可以創造出屬於自己嘅「蘇B時間」，或者可以大大改善曼聯今季嘅成績呢！
阿古路領曼城挫修頓
另一邊廂喺半場積分榜輸咗個馬鼻嘅曼城，禮拜二以衞冕身份出戰英聯盃第四圈，主場鬥上場英超俾李斯特城大炒9:0嘅修咸頓，滿以為藍月亮可以大開殺戒之際，結果曼城只係憑中堅奧達文迪先開紀錄，加上第350次為曼城上陣嘅阿古路省兩粒，以3:1擊敗有積克史堤芬斯破蛋嘅修咸頓，劏到上盤客一頸血，唔知兩隊禮拜六喺英超再遇，又會製造出乜比數呢？
另外，同一日贏波晉級嘅仲有以2:0擊敗屈福特嘅愛華頓，同埋以3:1搞掂英甲伯頓嘅李斯特城，而英甲嘅牛津聯就互射12碼踢走新特蘭，連同英乙嘅高車士打一齊晉級。