「執葉律師」何君堯俾佢母校英國安格里亞魯斯金大學（Anglia Ruskin University，ARU）以未符合樹立正面榜樣為理由，褫奪佢嘅名譽法學博士學位。何君堯梗係呱呱嘈，一陣又話人政治凌駕一切，但講多無謂，佢個Dr稱呼冇咗就點呼天搶地都好，冇咗就係冇咗。最慘仲要俾網民翻舊賬，恥笑佢之前寸寸貢，話買包花生坐住等睇大學會唔會DQ佢，以為自己好出名唔會有事，點知真係俾人郁就大叫唔公道。
毛EE動議即刪Dr.
原來之前英國上議院議員奧爾敦勳爵（Lord David Alton）近日去信佢母校，批評何君堯言論可恥，要求安格里亞魯斯金大學DQ佢個名譽法學博士的銜頭，何君堯之後喺微博貼咗有關消息，仲寸寸貢留言稱：「哈哈，我先去買包花生，坐着等」。
點知安格里亞魯斯金大學完全唔畀面執葉律師，話DQ就DQ，連登仔即刻拎出嚟鞭屍，恥笑何「除咗恭喜都唔知講咩好」，又有人寸何君堯𠵱家咪等到人DQ囉！仲話使唔使幫佢買多兩包花生呀？仲有問幾時DQ埋佢個學位，睇佢仲有冇得做執葉律師？
除咗連登仔寸佢，連議會陣線毛孟靜都加入，佢喺fb發文，「是咁的，我有個#譴責何君堯（#兼褫奪議席）嘅動議，喺立法會大會排緊隊」，而文下面貼咗張WhatsApp截圖，應該係助手同佢講，立會秘書處問呢個動議嘅英文版係咪要由Dr. Hon Junius HO，改做Hon Junius HO？呢個真係寸到應一應！
李八方