今年亞洲小姐競選香港區決賽將於周六舉行，14位候選佳麗前晚喺九龍城一間食肆試菜，8號許嘉欣有事缺席。12號馮熙淳係亞洲太平洋國際小姐冠軍，對於該選美主辦人之一嘅何紫綸指佢再參選亞姐有牴觸合約之嫌，馮熙淳表示呢餐飯其實以個人身份參加，問佢係唔係已經退選？佢話：「暫時仲考慮緊，因為嗰邊對我有一啲控訴，我同嗰邊嘅言語有少少誤會。」佢希望可以盡快解決問題參賽，問佢選亞姐前有冇通知何紫綸？佢就話：「所以我認喺呢方面處理得唔夠好，我已經同佢哋講唔好意思。」
羅霖教路
同場出席嘅仁美清叙榮譽主席羅霖，透露今次係第二次見呢班師妹，佢即場傳授心得：「見評判嘅時候盡量表現自己，喺台上面，行錯位或者跳錯舞步，唔緊要，記得保持笑容，眼要直望，腰要挺直。」
至於問答環節方面，羅霖教路：「睇多啲常識、國際新聞，着泳衣要保持身材好、脫毛、全身都要護膚，仲有操行分，缺席要有原因。」有傳亞視財困，佢話：「有留意，成日都聽到，聽到都好心悒，呢個時期各行各業都會裁員，我都有好多工作要取消。」
撰文：馮仁昭