八方記得有個政圈中人講過，有時要睇商界人士有冇良心，靠佢自己講冇用，睇佢點對下屬就知。特首林鄭月娥噚日朝早如常喺行會前見傳媒，因之前《金融時報》傳出中央有意換走佢，所以好多中外傳媒到場採訪。
話說777回應記者提問到尾段，在場駐守嘅林鄭副官、女G4陳嘉怡突然暈倒，在場發出「嘭」一聲嘅巨響，記者好多都嚇一跳，現場所見陳嘉怡嘴唇蒼白，要由其他人攙扶下離開。不過作為佢老闆嘅777，當時只係向陳嘉怡方向一望，之後繼續回應記者提問。當記者會完，好多記者走去睇吓陳嘉怡點，但777連問都冇問，轉身離開現場，完全冇任何表示。
特首辦回覆話，副官感到不適，佢當時清醒，自行上救護車送院治理。作為老闆嘅777，見到下屬喺佢側邊暈倒，可以咁不聞不問直行直過，佢對一般小市民會點？怕且不難想像。