香港抗暴之戰已長達四個多月，巿民對催淚彈習以為常，旺角更是重災區，商戶民居首當其衝。吳日言（Yan）投資七位數的飯糰分店日前在旺角開業，更是蝕到入肉，試過最低收入得數百元，但她依然無懼食催淚彈，為着良知與香港人同行。為求自救，Yan更親自到旺角街頭派傳單，可惜勁食檸檬。
採訪、攝影：卓寶花
吳日言投資七位數的飯糰分店，日前在抗暴之戰中開業，受社會氣氛及交通影響生意大跌，但在煙火中，她依然堅守良知。Yan日前就親自踩落旺角街頭派傳單宣傳新店，當她走到一群傳單姐姐中爭食，明顯功力不足勁食檸檬，但香港地到處總有愛，姐姐群起鼓勵，Yan笑說：「每日起碼10個姐姐派傳單，佢哋好努力，唔好話佢哋知唔知我乜水，啲人望都冇望我一眼，所以要宣傳都要諗吓計。」
突然要拉閘
新店選址在旺角，其實Yan在半年前已扑槌決定，她坦言：「做生意感受到成個社會氣氛同生意額上風險，地點近港鐵站口，試過鐵路唔開，商場突然要拉閘關門，好多嘢預計唔到，裝修時管理員通知或者會突然拉閘，自己雖然唔喺舖，但都感受到，下一秒唔知發生乜嘢事，同埋港鐵站突然叮噹聲一響又乜嘢事呢？做老闆都好擔心員工安危。」交通問題直接令生意額大跌，Yan只能無奈表示：「拉閘就更加啦，可以返去瞓覺，唉……呢段時間好艱難。」
「要食一齊食」
生意持續創新低，每日都入不敷支，Yan說︰「試過最低收入得幾百蚊，暫時睇盤數每日生意額都交唔到租。」在如今政局下跟大眾一樣處於捱打狀態，她慨嘆︰「希望業主減租，都想問吓李嘉誠捐出嗰10億基金幫助中小企係點申請。開舖有一定貨錢、人工、舖租、有基本開支，但唔減租商場要拉閘又冇人嚟，舖頭開唔到，都唔係健康事。」Yan用盡辦法為舖頭開源節流，親自落場執貨和老公充當物流運輸，甚至連店內的價錢牌都是DIY，慳得就慳，和員工共度時艱，做個良心老闆。
旺角近月來如同戰場，成為食催淚彈高危地，Yan和時下年輕人一樣無懼白色恐怖：「怕唔怕？唔怕，覺得食咪食囉，你夠膽喺我呢度放，咁我可以做啲乜嘢呀？要食咪大家一齊食囉。係無辜呀，但我咁算唔算係工作期間？我可唔可以帶個豬嘴吖？」Yan透露老公也曾食過催淚彈：「唔好話企正舖頭門口或屋企附近，其實好遠都飄到味道或澀眼，你嗰日眼晴苦澀就係食咗催淚彈。」至於她的店舖會否做學生優惠支持大家？她說：「我自己幫舖頭做咗好多嘢，我唔能夠代表舖頭，有其他股東，我知自己係一個有良知嘅人。」