現年39歲、大劉劉鑾雄大仔劉鳴煒，同前妻Wendy所生嘅一對龍鳳胎已經10歲，《蘋果》讀者陳小姐日前透過「爆相爆片」，分享喺主題公園遇上劉鳴煒帶仔女玩嘅過程。陳小姐指當日係星期六，約早上10點喺樂園發現劉鳴煒一行三人，當日着住藍色tee、短褲襯波鞋嘅劉鳴煒，身上孭住一個環保袋，佢帶一對龍鳳胎去玩機動遊戲，身邊未見有任何保鑣同家傭，亦未有用佢作為呢個主題公園副主席嘅特權，同其他人一樣排隊等玩。
英語交談
陳小姐表示：「喺列車見到佢哋，佢同一對仔女好好傾，聽到佢哋係用流利英文交談，一落車就走咗去『冰極天地』，不過機動遊戲未開，佢哋就企定定排隊，亦有去其他機動遊戲度高，不過佢對仔女唔夠高冇得玩，然後佢哋再返去排隊玩『冰極天地』，等待期間見佢細心遞水樽畀嗰仔飲。」
其實今年3月，已有讀者喺主題公園見過劉鳴煒，相信佢係公園常客，陳小姐話：「其間見到有海洋公園職員認得佢，有同佢講『劉生，你好』，我到1點鐘都仲見到佢哋喺萬聖節小遊戲counter排隊攞糖，見佢對仔女都算文靜，企定定，不過佢哋一家三口就唔算親密，唔見劉鳴煒拖住仔女，而對仔女亦冇挨住佢。
