反送中抗爭搞咗四個月仲未平息，原來唔覺唔覺已經拖到一哥、警務處長盧偉聰11月退休嘅日子，噚日有傳媒報道，有鑑於目前嘅社會氣氛，所以唔會按傳統喺一哥退休前為佢喺警總搞歡送會。有政圈好事之徒話，其實唔搞歡送都正常，事關佢聽聞警隊內好多前線唔妥一哥，仲搞乜歡送會！另外萬一引到成班網民去警總外「贈興」，搞到要請一哥食催淚彈放題，咁就唔係幾好啦。
警校結業禮或最後露面
根據《星島日報》報道，盧偉聰應該係11月18日退休，原本16號警察學院學警結業會操由佢主持檢閱儀式，當係退休前見記者，但𠵱家仲未決定係咪邀請傳媒採訪。至於傳統歷任一哥退休前夕喺警察總部舉行嘅歡送會，有鑑於目前社會氣氛未平，據報道已決定唔搞。
有政圈好事之徒話，原本盧偉聰諗住無風無浪退休，點估到777搞出場反送中抗爭，警察民望近乎破產，佢仲俾好多前線警員鬧，話佢冇撐前線，呢個時候仲搞歡送會？𠵱家警察員佐級協會主席林志偉同光頭sir幾惡呀，萬一佢哋講嘢單單打打一哥，咁就尷尬喇，不如唔搞好過搞。而且如果到時有網民去警總外集會要「歡送」一哥，搞到又要落閘又要放催淚彈咪仲煩，所以最好一哥低調退休算喇。
李八方