何弘軒曾經與巨星的距離很近，正確點說，他是站在巨星旁的人，當年他叫何偉圖。
童星出身，5歲參加《歡樂今宵》的「黎明模仿大賽」，獲黎明青睞得到傍住天王出騷表演的機會，其後接連在電影電視劇演出，對手是陳慧琳、郭晉安等大星。「細個我係冇小朋友嘅生活，冇咗自己童年，因為一放學就入片場拍劇等埋位。」
過幾天就34歲了，何弘軒現在與巨星的距離很遠，正確點說，因為他聽過不少人說他是「奀星」、「二打六」的冷言，他無奈，他接受。
「啲人成日話偽人偽人就係咁解囉！真係都幾虛偽㗎，我都係虛偽嗰個我自認！」何弘軒說。如今沒有唱片公司冇後台，靠自己自資出碟，更成立訓練童星的文化藝術中心，至少，小朋友世界只有純真沒有虛偽。
訓練中心的名稱，就叫「小明星」。何弘軒藝海浮沉，當不成巨星，小明星已如願。
撰文：文嘉龍
攝影：陳俊強
我係冇咗自己童年
當年只有5歲的何弘軒（本名何偉圖），因為母親和胞姊都很喜歡黎明，他就「被報名」參加了《歡樂今宵》的「黎明模仿大賽」環節，試音時選唱了《對不起我愛你》即被黎明相中，比賽也不用參加就直接「點燈」，與天王同台合唱，由參賽者變嘉賓。
「嗰時我得5歲，仲要啱啱開始甩牙冇咗隻牙。我由細到大都係聽黎明嘅歌大，屋企成日都聽佢嘅歌，佢啲歌我都識得背晒。」之後更有機會伴隨黎明到處表演，「去過高山劇場、去過伊館，仲有喺佢嘅mini concert，或者一啲fan club聚會。我嗰時有個稱號，係fan club改嘅，叫做『小黎明』，Leon嘅dancers又會同我伴舞唱《夏日燒著了》，我𠵱家諗番都覺得幾得意。」
自此開啟了他的童星之路，「電影就拍咗《仙樂飄飄》，電視劇亞視就拍咗《飄零燕》，嗰時亞視嚟講算係一個巨作，因為係第一個長劇集（80集），之後就唱咗鄭則仕《肥貓正傳》主題曲，跟住就去咗無綫拍《天降財神》，同郭晉安、歐陽震華拍（對手戲）。」何弘軒在《天降財神》演夏韶聲個仔、白茵個孫，每日放學就趕到片場等埋位。「我係冇小朋友生活㗎，冇咗自己童年啦，一放學就入片場等埋位，我係靠等埋位嘅時間去做功課溫書。郭晉安佢會過嚟幫我睇吓啲功課，喺片場因為冇其他小朋友，所以有萬千寵愛在一身嘅感覺囉！個個大哥哥大姐姐都會好錫呢個小朋友，覺得呢個小朋友好似好慘咁喎，一放學就要嚟拍劇，但係嗰時嘅我，係冇辛苦呢兩個字存在過，反而係好enjoy好開心，覺得有咁多大哥哥大姐姐錫我。」
何弘軒說，青春期令他性格大變，「男仔10歲、11歲開始變聲，嗰時個人好自閉呀，唔想接觸任何人，唔想唱歌，唔想講嘢啦直情！本身對自己把聲好有自信，一變咗聲就覺得自己好似另一個人咁，好唔慣，所以好長一段時間冇唱過歌，直到中四、中五開始變定咗把聲，先開始參加番一啲學校歌唱比賽。」
成日話偽人就係咁解
中五畢業後，何弘軒到了多倫多升學，參加當地新秀得了季軍，當時的全球華人新秀大賽，同屆還有林奕匡。「佢係溫哥華代表，我係多倫多。」
據何弘軒說，他回港後，凡是所有向各大小唱片公司自薦的機會，他都試過了，統統「食白果」。
終於機會來了，何弘軒在2015年再次入行，2017年得到當時的經理人公司支持，可以在九展開騷，卻惹來唱片公司高層冷言。「我記得有個高層同我講，佢話嗰時坤哥（吳業坤）、HotCha、羅孝勇幾個人先可以喺你個場度開一個騷咋喎，佢意思係話何弘軒，你憑乜自己一個人喺嗰度開騷呢？即係連自己公司嘅人都睇死自己喎，我覺得嗰吓好失望。」
他說連去品牌活動都被人指指點點。俾人話係奀星？「呢啲情況就真係好考驗人嘅EQ，咁我就當冇聽過囉！所以啲人成日話偽人偽人就係咁解，真係都幾虛偽㗎，我都係虛偽嗰個我自認！你聽到呢啲說話，唔通你行埋去『扯巴』佢咩？唔會囉，你要喺呢行生存就有好多嘢你要硬食，惟有自己爭氣，繼續爭氣繼續努力，唔好俾人睇死囉！」
郭晉安叫我唔好放棄
當年在他身邊的巨星們，至今陳慧琳和郭晉安仍然會給他鼓勵。「最近見番安仔郭晉安，其實佢已經完全遺忘咗我，我哋咁多年都冇見過，但係因為我哋宗教嘅緣故有機會見番面，佢先至有番印象。佢不斷鼓勵我，佢叫我唔好放棄，因為張國榮之前都係咁樣同佢講。佢將張國榮同佢講嘅說話同番我講，我覺得好窩心嗰種感覺，佢係睇住我一路一路成長。」
這一兩年，何弘軒開始經營生意來維持唱歌的興趣，除了開美容中心，還有他放最多心機、訓練童星的文化藝術中心，而父母亦有在金錢上支持。「係𠵱家啲小朋友喚醒番我，原來自己以前都係咁㗎喎！」現在沒有經理人公司和唱片公司，自由身靠自己，何弘軒說：「反正我又冇嘢輸，又冇人識我㗎啦，我鍾意做乜就做乜！」
場地提供：小明星文化藝術中心
化妝：Shirley Lee